विनापरवाना बंदूक
बाळगणाऱ्यास अटक

पावस, ता. २ ः रत्नागिरी तालुक्यातील गावखडी-गुरववाडी येथील नरेश भिकाजी गुरव (वय ६२) यांना विनापरवाना बंदूक बाळगल्याप्रकरणी अटक केली असून, त्यांच्यावर पूर्णगड सागरी पोलिस ठाण्यामध्ये गुन्हा दाखल करण्यात आला आहे. अधिक तपास पोलिस अमलदार संजय शिवगण करत आहेत. ही घटना १ ऑगस्टला रात्री आठ वाजता घडली.
गावखडी परिसरामध्ये सहायक पोलिस निरीक्षक संजय पाटील यांना याबाबत गोपनीय माहिती मिळाली होती. एक व्यक्ती कोणताही परवाना नसताना बंदूक बाळगतो. सहायक पोलिस निरीक्षक संजय पाटील यांच्यासह अंमलदार महेश मुरकर, हेडकॉन्स्टेबल महेश कुबडे, प्रकाश झोरे, चालक प्रसाद जाधव असे गोपनीय माहितीच्या आधारे गावखडी बलाची धार या ठिकाणी गस्त घालत असताना एक जण हातात बंदूक घेऊन रात्री आठ वाजता फिरत होता. त्याला थांबून बंदुकीची पाहणी केली असता सिंगल बॅरल काडतुसाची बंदूक तसेच त्याच्याजवळ जिवंत ८ काडतुसे सापडली. त्याला बंदूक बाळगण्याचा परवाना आहे का, असे विचारल्यानंतर त्याने नाही म्हणून सांगितले. त्याला विचारल्यानंतर आपले नाव नरेश भिकाजी गुरव असल्याचे सांगून गावखडी गुरववाडीमध्ये राहतो, असे सांगितले. त्यामुळे त्याने विनापरवाना बंदूक बाळगल्याप्रसंगी त्याला अटक करून त्याच्याविरुद्ध पूर्णगड पोलिस ठाण्यामध्ये गुन्हा दाखल करण्यात आला. तपास पोलिस अंमलदार संजय शिवगण करत आहेत.