रमेश कदम-सामंत भेटीने
राजकीय चर्चांना उधाण
चिपळूण, ता. ३ः पालकमंत्री उदय सामंत यांनी आपल्या चिपळूण दौऱ्यात माजी आमदार रमेश कदम यांची भेट घेतली. कदम निरुपद्रवी नेते आहेत, असे सूचक विधान पालकमंत्र्यांनी केल्यानंतर राजकीय चर्चांना उधाण आले आहेत.
पालकमंत्री सामंत आणि माजी आमदार कदम या दोघांमधील सततच्या भेटींवरून राजकीय चर्चा सुरू झाली आहे. ही सदिच्छा भेट असल्याचे पालकमंत्र्यांनी सांगितले, परंतु या भेटीमागे राजकीय अर्थ काढला जात आहे. दोघांचे संबंध भविष्यातील राजकीय गणित जुळवणारे आहेत की काय याची चर्चा सुरू आहे.
रमेश कदम सध्या शरद पवारांच्या राष्ट्रवादीमध्ये आहेत. त्यांचे सर्वच पक्षातील नेत्यांशी चांगले संबंध आहे. काही दिवसांपूर्वी त्यांनी उपमुख्यमंत्री एकनाथ शिंदे यांच्या शिवसेनेचे नेते रामदास कदम यांची खेडमध्ये जाऊन भेट घेतली होती. खासदार सुनील तटकरे चिपळूण दौऱ्यात आल्यानंतर ते कदमांच्या घरी जाऊन त्यांची भेट घेतात. तीच परंपरा जिल्ह्याचे पालकमंत्री उदय सामंत यांनीही जपली आहे. पालकमंत्री सामंत यांचे अलीकडे चिपळूणचे दौरे वाढले आहेत. चिपळूणमध्ये शिवसेना वाढवण्यासाठी त्यांनी शरद पवार गटाच्या पहिल्या फळीतील नेते आणि पक्षाचे प्रदेश सरचिटणीस प्रशांत यादव यांना निमंत्रण दिले होते. प्रशांत यादव हे रमेश कदम यांच्या विचाराने चालतात. त्यामुळे यादव हे रमेश कदम यांना सोडून जाणे सध्यातरी शक्य नाही. त्यामुळे रमेश कदम यांनाच पक्षात घेतले तर यादवांचा प्रदेशाचा मार्ग सोपा होईल, असा तर्कही लावला जात आहे.

चौकट
जिल्ह्यातील जे नेते निरुपद्रवी आहेत, त्यांच्यामध्ये रमेश कदमांचा समावेश होतो. त्यामुळे मी त्यांच्याकडे येत असतो. आजही मी रमेश कदमांना पन्ह आहे का, असे विचारल्यावर त्यांनी हो म्हणताच मी त्यांना भेटायला आलो. ते गोड पन्ह पाजतात, म्हणून आलो.
- उदय सामंत, पालकमंत्री, रत्नागिरी जिल्हा

कोट
आमच्यातील संबंध चांगले आहेत. त्यामुळे नेहमीच चर्चा होत असते. यात वेगळे काही नाही.
- रमेश कदम, माजी आमदार, चिपळूण