कलांगणच्या तालुकास्तरीय
वक्तृत्व स्पर्धेत मेस्त्री प्रथम
संगमेश्वर, ता. ३ ः कलांगण संगमेश्वरतर्फे तालुकास्तरीय वक्तृत्व स्पर्धा बुरंबी येथील दादासाहेब सरफरे विद्यालयात झाली. त्यामध्ये १३ शाळांतील १९ स्पर्धकांनी सहभाग घेतला.
देवरुख महाविद्यालयाच्या प्रा. डॉ. वर्षा फाटक आणि संगमेश्वरी बोली फेम विद्यार्थिप्रिय शिक्षक आनंद बोंद्रे यांनी या स्पर्धेचे परीक्षण केले. बक्षीस वितरणाला स्पर्धेच्या समन्वयक, सुप्रसिद्ध अभिनेत्री सौ. संपदा जोगळेकर-कुळकर्णी, सौभाग्य अलंकारचे यशवंत सैतवडेकर, बुरंबी पंचक्रोशी शिक्षण संस्थेचे अध्यक्ष राजाराम गर्दे, सचिव शरद बाईत, मुख्याध्यापक प्रकाश वीरकर, कलांगणचे अध्यक्ष अमोल लोध आदी उपस्थित होते. देवरूख न्यू इंग्लिश स्कूलच्या श्रेया मेस्त्रीने प्रथम, दादासाहेब सरफरे विद्यालयाच्या अनन्या डोळसने द्वितीय, ठाकरे विद्यालयाच्या माही वनकरने तृतीय क्रमांक प्राप्त केला. विजेत्या स्पर्धकांना सन्मानचिन्ह, पुस्तके आणि रोख रक्कम देण्यात आली. यावर्षी प्रथमच प्रथम क्रमांक प्राप्त विद्यार्थ्याचे मार्गदर्शक शिक्षक देवरुख हायस्कूलचे मंगेश रसाळ यांना रोख रक्कम आणि प्रशस्तिपत्र देऊन गौरविण्यात आले. सर्व सहभागी आणि विजेत्या स्पर्धकांना प्रशस्तिपत्र देण्यात आले.