जिल्ह्यात १७ पर्यंत
मनाई आदेश
रत्नागिरी : जिल्ह्यातील कायदा व सुव्यवस्था अबाधित राहण्यासाठी आजपासून १७ ऑगस्टपर्यंत जिल्ह्यात प्रतिबंधात्मक मनाई आदेश प्र. अपर जिल्हादंडाधिकारी राहुल गायकवाड यांनी दिला आहे. जिल्ह्यात विविध राजकीय पक्ष, विविध संघटना वेगवेगळ्या घटकांतील नागरिकांकडून त्यांच्या विविध मागण्यांसाठी आंदोलनात्मक कार्यक्रमांचे आयोजन करण्यात येतात. जिल्ह्यात मुंबई-गोवा राष्ट्रीय महामार्गाचे काम पूर्ण न झाल्याच्या निषेधार्थ आंदोलन केले जाते. अशा वेळी आंदोलनकर्त्यांच्या मागण्या मान्य न झाल्यास कायदा व सुव्यवस्था बिघडू शकते. १५ ऑगस्ट रोजी स्वातंत्र्यदिन व १६ रोजी गोपाळकाला हे सण आहेत. या पार्श्वभूमीवर जिल्ह्यातील कायदा व सुव्यवस्था अबाधित राखणे आवश्यक असल्याने मनाई आदेश जारी करण्यात आला आहेत.

----
पोस्टर्स प्रेझेंटेशन स्पर्धेत
दळी, माने प्रथम
चिपळूण ः नवी दिल्ली येथे झालेल्या पोस्टर्स प्रेझेंटेशन स्पर्धेत शरदचंद्र पवार कृषी महाविद्यालयाचा विद्यार्थी स्वयंम दळी याने उद्योजकीय उपक्रम व संशोधन विभागात, तर सानिया माने हिने जैविक अर्थव्यवस्था व टाकाऊ पदार्थ व्यवस्थापन विभागामधून प्रथम क्रमांक मिळवला. कृषी महाविद्यालयामधील विद्यार्थ्यांसाठी कृषी संशोधन व विस्तार याबाबत मार्गदर्शन तसेच संशोधनात्मक स्पर्धा नवी दिल्ली येथील भारतीय कृषी अनुसंधान परिषदेने आयोजित केली होती. त्यामध्ये महाराष्ट्रातील अनेक विद्यार्थ्यांनी यामध्ये सहभागी झाले होते. या स्पर्धेत श्री. दळी याने ज्वारीपासून बनवलेले पापड, पीठ व माने हिने फणसापासून बनवण्यात आलेल्या सूप यावर आपले संशोधन सादर केले. या नावीन्यपूर्ण संशोधनासाठी उपस्थितांनी स्वयम व सानिया यांना भरभरून दाद दिली. त्यांच्या या देदीप्यमान यशाबद्दल आमदार शेखर निकम व प्राचार्य डॉ. सुनितकुमार पाटील यांनी कौतुक केले.
----
असुर्डे विद्यालयात
ज्ञान प्रबोधिनी क्रीडा शिबिर
चिपळूण : पुणे येथील ज्ञान प्रबोधिनी संस्था निगडी पुरस्कृत टाटा उद्योग समूहाच्या अर्थसहाय्याने ग्रामीण भागांतील विद्यार्थ्यांना देशी खेळ व खेळांचे पायाभूत ज्ञान शिबिर सह्याद्री शिक्षणसंस्थेचे वसंत शंकर देसाई माध्यमिक व उच्च माध्यमिक विद्यालयाने आयोजित केले होते. या शिबिराचे उद्‌घाटन कुशिवडेतील युवा उद्योजक योगेश भागडेंच्या हस्ते झाले. या शिबिरासाठी आमदार शेखर निकम यांचा मुलगा व सह्याद्री क्रीडा प्रबोधिनीचे अध्यक्ष अनिरुद्ध निकम हे उपस्थित होते. यावेळी निकम यांनी विद्यार्थ्यांना आपला सर्वांगीण विकास साधण्याचे आवाहन केले. विद्यालयाचे मुख्याध्यापक अमर भाट यांच्या मार्गदर्शनानुसार या शिबिराचे आयोजन करण्यात आले. शिबिरासाठी विशाल सुर्वे, समन्वयक चिपळूण तालुका ज्ञान प्रबोधिनी संस्था, क्रीडा प्रबोधिनी प्रशिक्षक क्रांती म्हसकर व नवमान पटेल, बांबाडे गुरुजी आदी उपस्थित होते.
---------------
वक्तृत्व स्पर्धेत
सिद्धांत, संस्कार प्रथम
मंडणगड ः दहागाव येथील लाल बहादूर शास्त्री हायस्कूलमध्ये लोकमान्य बाळ गंगाधर टिळक यांची पुण्यतिथी व लोकशाहीर अण्णाभाऊ साठे यांची जयंती उत्साहात साजरी करण्यात आली. यानिमित्त पाचवी ते सातवी आणि आठवी ते दहावी, अशा दोन गटांत वक्तृत्व स्पर्धा घेण्यात आल्या. यामध्ये लहान गटात १४, तर मोठ्या गटात १० विद्यार्थी सहभागी झालेले होते. विद्यार्थ्यांनी लोकमान्य टिळक व अण्णा भाऊ साठे यांच्या जीवन चरित्रावर माहिती दिली. या स्पर्धेत लहान गटातून कुमार सिद्धांत सोविलकर याने प्रथम क्रमांक, पलक पवार द्वितीय, शुभ्रा मोरे हिने तृतीय क्रमांक मिळवला. मोठ्या गटात संस्कार जाधव, माधव पवार, ईश्वरी खामकर व सिया एरवनकर यांनी यश मिळवले. या स्पर्धेसाठी किशोर कासारे, मनोज चव्हाण, मानसी पालांडे यांनी परीक्षक म्हणून काम पाहिले. यानंतर शिक्षक किशोर कासारे यांनी मार्गदर्शन केले.