82175

पिलरची सळी पडून विद्यार्थी जखमी
चिपळूणमध्ये घटना ः युवासेना, मनसेने अर्धा तास महामार्ग रोखला
सकाळ वृत्तसेवा
चिपळूण, ता. ४ ः मुंबई-गोवा महामार्गावर चिपळूण शहरात उड्डाणपुलाचे काम सुरू आहे. डीबीजे महाविद्यालयासमोरील एका पिलरवर लोखंडी सळ्या टाकण्याचे काम सुरू असतानाच त्यातील एक सळी रस्त्यावरून जाणाऱ्या विद्यार्थ्याच्या हातावर पडली. त्यात विद्यार्थी बालंबाल बचावला असून, त्याच्या हाताला किरकोळ दुखापत झाली. ही घटना घडल्यानंतर शिंदे शिवसेनेच्या युवासेना आणि मनसेच्या पदाधिकाऱ्यांनी ठेकेदारांवर गुन्हा दाखल करण्याच्या मागणीसाठी रास्ता रोको केला. सुमारे अर्ध्या तासाहून अधिक काळ महामार्गावरील वाहतूक ठप्प झाली होती.
शहरातील बहादूरशेखनाका ते पाग बौद्धवाडी दरम्यानच्या उड्डाणपुलाचे काम सुरुवातीपासूनच वादग्रस्त बनले आहे. दोन वर्षांपूर्वी गर्डर कोसळल्याची गंभीर घटना घडली होती. त्यानंतर काही महिन्यांतच पिलरवरून दोन कर्मचारी पडून गंभीर जखमी झाले होते. त्यापाठोपाठ सुरक्षेसाठी पुलाच्या ठिकाणी लावलेली जाळी धावत्या ट्रकला अडकली होती. याशिवाय सातत्याने या परिसरात किरकोळ व मोठे अपघात आहेत. या सर्व घटनांच्या पार्श्वभूमीवर संबंधित ठेकेदार कंपनीला प्रशासनाकडून खबरदारीच्या सूचना सातत्याने केल्या होत्या. अशातच सोमवारी डीबीजे महाविद्यालयासमोर उड्डाणपुलावर पिलरसाठी टाकण्यात येत असलेली लोखंडी सळी अचानक खाली पडली. त्यात महाविद्यालयीन विद्यार्थी अथर्व शिंदे याच्यावर पडली. यात त्याच्या हाताला दुखापत झाली. त्याला तत्काळ उपचारासाठी खासगी रुग्णालयात नेण्यात आले.
या घटनेची माहिती मिळताच अनेकांनी घटस्थळी धाव घेतली. शिंदे सेनेच्या युवासेनेचे निहार कोवळे, मनसे जिल्हाध्यक्ष संतोष नलावडे यांच्यासह पदाधिकाऱ्यांनी आक्रमक भूमिका घेत थेट महामार्ग रोखला. त्यामुळे महामार्गावरील वाहतूक ठप्प झाली होती. पोलिसांनी घटनास्थळी धाव घेऊन जमाव पांगवण्याचा प्रयत्न केला. मात्र, जोवर राष्ट्रीय महामार्ग विभागाचे अधिकारी व ठेकेदार कंपनी प्रतिनिधी येत नाहीत, त्यांच्यावर गुन्हा दाखल होत नाही. तोपर्यंत रास्ता रोको सुरूच ठेवण्याची भूमिका घेतली. कंपनी प्रतिनिधी घटनास्थळी आल्यानंतर त्यानाही घेराओ घालण्यात आला. त्यानंतर पोलिसांनी सर्वांना शांत करत महामार्ग खुला केला.

आधीच्या गुन्ह्यांचे काय
महामार्गावरील उड्डाणपुलाच्या कामात सातत्याने हलगर्जी व निष्काळजीपणामुळे अपघात घडत आहेत. या प्रत्येक घटनेवेळी ठेकेदार कंपनीवर कायदेशीर कारवाईचे आश्वासन दिले जाते; परंतु प्रत्यक्षात कारवाई होत नाही. त्यामुळे यावेळी ठेकेदार कंपनीवर गुन्हा दाखल झाल्याशिवाय माघार नाही, अशी भूमिका पदाधिकाऱ्यांनी घेतली.