82279

नियमित चिकित्सेने आजारांवर नियंत्रण
डॉ. रमेश कर्तस्करः सिंधुदुर्गनगरीत ‘लेखापरीक्षा दिन’ उत्साहात
सकाळ वृत्तसेवा
ओरोस, ता. ५ः आरोग्य शिबिरांमुळे कर्मचाऱ्यांना आपल्या आरोग्याची नियमित तपासणी करण्याची संधी मिळते. यामुळे संभाव्य आजारांवर वेळीच नियंत्रण मिळविता येते. सर्वांनी आपल्या आरोग्याची योग्य काळजी घ्यावी, असे आवाहन अतिरिक्त जिल्हा आरोग्य अधिकारी डॉ. रमेश कर्तस्कर यांनी केले.
स्थानिक निधी लेखापरीक्षा विभाग, सिंधुदुर्ग यांच्या वतीने जिल्हा परिषदेच्या नाथ पै सभागृहात स्थानिक निधी लेखापरीक्षा दिन उत्साहात साजरा करण्यात आला. यावेळी मार्गदर्शन करताना डॉ. कर्तस्कर बोलत होते. यावेळी त्यांनी आरोग्य तपासणी शिबिराचे महत्त्व विशद केले. यानिमित्त विविध कार्यक्रमांचे आयोजन करण्यात आले. यात आरोग्य तपासणी शिबिर आणि लेखापरीक्षण संबंधी मार्गदर्शनपर व्याख्यानाचा समावेश होता.
या कार्यक्रमाला प्रमुख पाहुणे म्हणून जिल्हा कोषागार अधिकारी अमित मेश्राम, मुख्य लेखा व वित्त अधिकारी श्री. डवरी, अतिरिक्त जिल्हा आरोग्य अधिकारी डॉ. कर्तस्कर उपस्थित होते. प्राथमिक आरोग्य केंद्र, कसाल येथील वैद्यकीय अधिकारी आणि त्यांच्या पथकाने आरोग्य शिबिरासाठी विशेष सहकार्य केले. जिल्हाधिकारी कार्यालयातील लेखाधिकारी श्री. चिंदरकर यांनी या कार्यक्रमात प्रशिक्षण घेतले.
कार्यक्रमाच्या सुरुवातीला स्थानिक निधी लेखापरीक्षा विभागाचे सहाय्यक संचालक डॉ. शिवप्रसाद खोत यांनी प्रास्ताविक केले. त्यांनी लेखापरीक्षणाचे महत्त्व आणि विभागाच्या कार्याबद्दल माहिती दिली. यावेळी श्री. मेश्राम यांनी लेखापरीक्षणाची प्रक्रिया, त्याचे महत्त्व आणि सरकारी कामकाजात पारदर्शकता आणण्यासाठी त्याची भूमिका यावर सविस्तर मार्गदर्शन केले. त्यांनी सर्व कर्मचाऱ्यांचे कामाबद्दल कौतुक केले.
या कार्यक्रमात उपस्थितांसाठी आरोग्य तपासणी शिबिर आयोजित करण्यात आले. यामध्ये सर्व अधिकारी व कर्मचाऱ्यांनी सहभाग घेतला. त्यानंतर लेखापरीक्षण संबंधी मार्गदर्शनपर व्याख्यान झाले. डॉ. खोत यांनी आभार मानले.