82369

‘नापणे’वर कोकणी मेवा उपलब्ध करा

डॉ.विजय सूर्यवंशी ः काचेच्या पुलाची केली पाहणी

सकाळ वृत्तसेवा
वैभववाडी, ता. ५ ः काचेच्या पुलाच्या उभारणीनंतर नापणे धबधब्यावर पर्यटकांची गर्दी वाढली आहे. त्यामुळे येथे येणाऱ्या पर्यटकांसाठी महिला बचत गटाच्या माध्यमातून कोकणी मेवा उपलब्ध करून द्यावा, अशा सूचना कोकण विभागीय आयुक्त डॉ. विजय सूर्यवंशी यांनी येथे केल्या.
नापणे धबधब्यावर उभारलेल्या काचेच्या पुलाची श्री. सूर्यवंशी यांनी पाहणी केली. यावेळी जिल्हाधिकारी अनिल पाटील, मुख्य कार्यकारी अधिकारी रवींद्र खेबुडकर, प्रांतधिकारी जगदीश कातकर, तहसीलदार सूर्यकांत पाटील, सरपंच प्रदीप जैतापकर आदी उपस्थित होते. श्री. सूर्यवंशी म्हणाले, ‘‘काचेच्या पुलावर जाऊन पाहणी करणे हा एक वेगळा अनुभव आहे. हे पुल पर्यटकांसाठी वेगळे आकर्षण ठरले आहे. त्यामुळे पुर्वीच्या तुलनेत पर्यटकांची गर्दी वाढत असल्याचे दिसून येत आहे. त्यामुळे येथे येणाऱ्या पर्यटकांसाठी सुविधा निर्माण करून देण्याचा प्रयत्न राहील. कोकणातील विविध फळांपासून अनेक उत्पादने तयार केली जातात. महिला बचत गटांनी तयार केलेला कोकणी मेवा येथे येणाऱ्या पर्यटकांसाठी उपलब्ध करून द्यावा.’’ नापणे मुख्य धबधब्याचे समोरून दर्शन घेता यावे यासाठी काही करता येईल का? यासंदर्भातही त्यांनी जिल्हाधिकाऱ्यांना सुचना केल्या आहेत. त्यादृष्टीने देखील भविष्यात प्रयत्न केले जातील. येथील धबधबा आणि परिसराची संपुर्ण माहिती पर्यटकांना देण्यासाठी एखाद्या गाईडची नेमणूक करावी, असे देखील त्यांनी सुचविले.