‘गोगटे’ महाविद्यालयात
एमबीए प्रवेश सुरू
रत्नागिरी, ता. ६ : गोगटे- जोगळेकर महाविद्यालयात (स्वायत्त) शैक्षणिक वर्ष २०२५-२६ पासून नव्याने सुरू करण्यात आलेल्या एमबीए अभ्यासक्रमाच्या प्रवेशप्रक्रियेस सुरुवात झाली आहे. नॅक मुल्यांकनात महाविद्यालयाने सलग चारवेळा ‘अ’ श्रेणी प्राप्त केली असून, याचीच परिणीती म्हणजे विद्यापीठ अनुदान आयोग (युजीसी) आणि मुंबई विद्यापीठाने ३१ मे २०२३ रोजी महाविद्यालयाला स्वायत्ततेचा दर्जा दिला आहे. या पार्श्वभूमीवर र. ए. संस्थेच्या कार्याध्यक्षा शिल्पा पटवर्धन, कार्यवाह सतीश शेवडे यांच्या मार्गदर्शनानुसार महाविद्यालयात शैक्षणिक वर्ष २०२४-२५ पासून बीपीए (बॅचलर ऑफ परफॉर्मिंग आर्ट्स) आणि बीबीए (बॅचलर ऑफ बिझनेस ॲडमिनिस्ट्रेशन) तर शैक्षणिक वर्ष २०२५-२६ पासून एमएससी (डाटा सायन्स) व एमबीए (मास्टर्स इन बिझनेस ॲडमिनिस्ट्रेशन) हे चार नवीन व्यावसायिक अभ्यासक्रम सुरू करण्यात आले आहेत. एमबीए अभ्यासक्रमाची प्रवेशप्रक्रियादेखील १ ऑगस्टपासून सुरू झाली आहे. इच्छुक विद्यार्थी आणि पालकांनी महाविद्यालयाच्या https://gjcrtn.ac.in/ या संकेतस्थळाला भेट द्यावी. अभ्यासक्रमासंदर्भात माहिती, प्रवेशासाठी प्रा. स्वप्नील जोशी, प्रा. प्रवीणा पिलणकर यांच्याशी कार्यालयीन वेळेत संपर्क साधावा.
---