82541

सावंतवाडी रुग्णालयाचे ग्रहण सुटेना

आंदोलनेही निष्फळ; जनरल फिजिशनअभावी रुग्णांना गोव्यात पाठविण्याची वेळ

रूपेश हिराप ः सकाळ वृत्तसेवा
सावंतवाडी, ता. ६ ः अनेक वर्षे आंदोलन करूनही येथील उपजिल्हा रुग्णालयाला समस्यांचे ग्रहण कायम आहे. दीर्घकाळ मागणी करूनही जनरल फिजिशियनची नियुक्ती न झाल्याने येथे येणाऱ्या रुग्णांना गोव्याची (गोवा मेडिकल कॉलेज) वाट धरावी लागत आहे. यासह इतर प्रश्न सोडविण्यात लोकप्रतिनीधी कमी पडल्याने स्थानिकांमध्ये संतापासह हतबलताही पहायला मिळत आहे.
येथील उपजिल्हा रुग्णालयात अनेक कारणांनी नेहमीच चर्चेत राहिले आहे. त्या ठिकाणी असणारी अपूर्ण यंत्रणा याला कारणीभूत आहे. खेड्यापाड्यातील गोरगरीब जनता या रुग्णालयाकडे आशेचा किरण म्हणून पाहात असताना या ठिकाणी केवळ सर्दी, ताप व अन्य किरकोळ आजारांव्यतिरिक्त काहीच उपचार होताना दिसत नाहीत. याला एकमेव कारण म्हणजे या ठिकाणी असलेली रिक्त पदे आणि सर्वांत महत्त्वाचे म्हणजे जनरल फिजिशियन हे पद गेले काही वर्षे रिक्त आहे. रुग्णालयातील ओपीडीची संख्या लक्षात घेता दिवसांपूर्वी शेकडो रुग्ण उपचारासाठी दाखल होत असतात. त्यातील बऱ्याच रुग्णांना त्या ठिकाणी उपचारासाठी दाखलही केले जाते. गंभीर आजाराचे रुग्णही बऱ्याचदा या ठिकाणी अत्यावश्यक सेवेसाठी दाखल होतात. मात्र, येथे त्या-त्या आजारावर आवश्यक असलेले डॉक्टरच उपलब्ध नसल्याने केवळ प्राथमिक उपचार करून त्यांना गोवा मेडिकल कॉलेजचा रस्ता दाखवावा लागतो.
एकीकडे माजी मंत्री आमदार दीपक केसरकर, माजी पालकमंत्री रवींद्र चव्हाण यांच्या पाठपुराव्याने अत्याधुनिक सुविधा येथे दिल्या आहेत. खासदार नारायण राणे, विद्यमान पालकमंत्री नीतेश राणे यांनीही आरोग्य यंत्रणा सक्षम करण्यावर भर दिला आहे. त्यातून उपजिल्हा रुग्णालयात मॉड्यूलर आयसीयू, सोनोग्राफी मशीन, वातानुकूलित ब्लड बँक, शस्त्रक्रिया विभाग (ऑपरेशन थिएटर), डायलेसीस सेंटर, मोफत सिटी स्कॅन सुविधा, एक्स-रे आदी सुविधा येथे उपलब्ध आहेत.
रुग्ण व डॉक्टरांना सोयीचे ठराव म्हणून आता लिफ्टचीही सोय उपलब्ध करून देण्यात येत आहे. मात्र, या सर्व सुविधा उपलब्ध असूनही केवळ डॉक्टरांअभावी या रुग्णालयामध्ये उपचारांची वानवा आहे. मुळात रिक्त पदामागे या ठिकाणी नेमणूक केलेले डॉक्टर कायमस्वरूपी टिकत नाही हेच मुख्य कारण आहे. रिक्त पदांमध्ये नेमणूक केलेले डॉक्टर कायमस्वरुपी गैरहजर असल्याने ती जागा रिक्त असल्याचे दिसून येत आहे. या ठिकाणी डॉक्टर का टिकत नाहीत? हा संशोधनाचा विषय असला, तरी हा गंभीर प्रकार गेले कित्येक वर्षापासून सिंधुदुर्ग जिल्ह्यात सुरू आहे. या रुग्णालयामध्ये फिजिशियन डॉक्टर मिळावारू, यासाठी अलीकडेच रक्तदाता संघटना आणि सामाजिक बांधिलकीच्या पदाधिकाऱ्यांनी आंदोलन केले. त्याची गंभीर दखल घेत आमदार केसरकर यांनी तत्काळ आरोग्यमंत्र्यांच्या माध्यमातून या ठिकाणी फिजिशियनची नेमणूक केली. परंतु, नेमणूक करूनही संबंधित फिजिशियन सावंतवाडीत साधा हजरही झाला नाही. त्यामुळे छोट्या शहरांमध्ये फिजिशियनसारख्या डॉक्टरांची येण्याची मानसिकता नसल्याचे दिसून येत आहे.
येथील रुग्णालयात उपलब्ध डॉक्टरांकडून आहे, त्याच परिस्थितीत प्रामाणिक रुग्णसेवेवर भर दिला जात आहे. परंतु, त्यांचेही हात आकुडते आहेत. जेवढी सेवा देता येईल तेवढी सेवा त्यांच्याकडून नेहमीच दिली जाते. मात्र, मर्यादेच्या बाहेर जाऊन रिक्स घेणे कुठला डॉक्टर करणार हासुद्धा मुद्दा असल्याने बऱ्याच रुग्णांना गोवा वारी करावी लागते. जनरल फिजिशियन नसल्याने ओपीडीवर प्रचंड ताण पाहायला मिळतो. त्यामुळे लोकप्रतिनिधींकडून अत्याधुनिक सुविधा निर्माण करत असताना पूर्णवेळ हृदयरोग तज्ज्ञ, भूलतज्ज्ञ, फिजिशीयन, न्युरोलॉजिस्ट उपलब्ध करावेत व रिक्तपद तातडीने भरून जनसामान्यांना उपजिल्हा रुग्णालयातच चांगले उपचार उपलब्ध करावेत, अशी मागणी होत आहे.
-------------------
महिला रुग्णांची संख्या घटली
येथील उपजिल्हा रुग्णालयात सद्यस्थितीत याठिकाणी जनरल फिजिशियन, हृदयरोग तज्ज्ञ, पूर्णवेळ भूलतज्ज्ञ, न्यूरोलॉजिस्ट हे महत्त्वाचे डॉक्टर उपलब्ध नाहीत. स्त्री रोग तज्ज्ञ ज्ञानेश्वर दुर्भाटकर यांच्या काळात या ठिकाणी प्रसूतीसाठी अनेक महिला रुग्ण दाखल होत असत. परंतु, ती संख्याही आता घटली आहे. कुडाळ महिला रुग्णालयाचे कारण यासाठी पुढे केले जात असले, तरी रुग्णसेवा योग्य मिळत नसल्यामुळेच परिस्थिती असल्याचे अनेकांतून बोलले जात आहे.
------------
मशिनरीसोबत डॉक्टरही महत्त्वाचे
सावंतवाडी रुग्णालयात दोनच दिवसांपूर्वी आमदार दीपक केसरकर यांच्या प्रयत्नातून दोन डायलेसीस मशिन बसविल्या. याचा रुग्णांना फायदा होणारच आहे. मात्र, ज्याप्रमाणे डायलेसीस मशीन तसेच अन्य सुविधा या रुग्णालयात उपलब्ध करून देण्यात आल्या त्याचप्रमाणे रिक्त पदे भरून आवश्यक डॉक्टर्स येथे उपलब्ध करुन देण्यासाठी त्यांनी प्रयत्न करावेत, अशी मागणी जनतेतून होत आहे.
--------------
आवश्यक असलेली पदे
* जनरल फिजिशियन
* हृदयरोग तज्ज्ञ
* पूर्णवेळ भूलतज्ज्ञ
* न्यूरोलॉजिस्ट
-----------
कोट
येथील उपजिल्हा रुग्णालयामध्ये रिक्त असलेली पदे भरण्यासाठी रक्तदाता संघटना आणि सामाजिक बांधिलकीच्या माध्यमातून आंदोलन करत प्रशासनाचे लक्ष वेधण्यात आले. आमदार दीपक केसरकर यांनी प्रयत्न करून जनरल फिजिशियन या ठिकाणी मंजूर केल्याने आम्ही आमचे आंदोलन काहीसे स्थगित केले होते. मात्र, संबंधित फिजिशियन हजर न झाल्याने हे पद आजही रिक्त आहे. परिणामी, आम्हाला पुन्हा आंदोलनासारखा मार्ग हाती घ्यावा लागणार आहे. जोपर्यंत फिजिशन उपलब्ध होत नाही, तोपर्यंत आंदोलनाची भूमिका कायम राहणार आहे.
- देव्या सूर्याजी, रक्तदाता संघटना अध्यक्ष तथा उपजिल्हा रुग्णालय रुग्ण कल्याण नियामक समिती सदस्य