82556

प्रकृती खालावल्याने आईसह पत्नी रुग्णालयात

सोनकुसरे कुटुंबाचे उपोषण; तिसऱ्या दिवशीही प्रशासनकडून दखल नाही

सकाळ वृत्तसेवा
सिंधुदुर्गनगरी, ता. ६ ः शासन निर्णयानुसार माध्यमिक शिक्षणाधिकाऱ्यांनी तत्काळ हजर होण्याच्या दिलेल्या लेखी आदेशानुसार हजर होऊनही अद्याप नियुक्ती आदेश न दिल्याने, जानेवारीपासून सहा महिन्यांचे वेतन न मिळाल्याने तसेच वैयक्तिक मान्यता प्राप्त स्थायी कर्मचारी म्हणून नियुक्ती आदेश द्यावा, तसेच थकीत वेतन तत्काळ मिळावे, या मागणीसाठी जामसंडे येथील प्रमोद सोनकुसरे यांनी आपल्या कुटुंबासमवेत सोमवार (ता.४) पासून जिल्हा परिषदेसमोर सुरू केलेले बेमुदत उपोषण आज तिसऱ्या दिवशी सुरू होते. दरम्यान, त्यांची आई व पत्नीची प्रकृती खालावल्याने त्यांना जिल्हा रुग्णालयात दाखल केले आहे.
श्री. सोनकुसरे यांचे म्हणणे आहे की, वारंवार पत्रव्यवहार व प्रत्यक्ष भेट घेऊन लक्ष वेधले असतानाही अद्याप नियुक्ती आदेश दिलेला नाही. तसेच जानेवारीपासून आजपर्यंत वेतन मिळालेले नाही. यामुळे आर्थिक अडचण व कुटुंबीयांची उपासमार होत आहे. त्यामुळे आता उपोषणाचा मार्ग धरावा लागला. मात्र, गेले तीन दिवस याची दखल घेण्यात आली नाही. केवळ थातुर-माथुर आश्वासने देऊन उपोषण सोडविण्याचा प्रयत्न होत आहे. जोपर्यंत मला अधिसंख्य पदावर नियुक्तीचे लेखी आदेश देण्यात येत नाहीत तसेच थकीत वेतन मिळत नाही, तोपर्यंत उपोषण करणार असल्याचे सोनसुरकर यांनी सांगितले. दरम्यान, आज उपोषणाच्या तिसऱ्या दिवशी त्यांची आई व पत्नीची प्रकृती खालावल्याने त्यांना जिल्हा रुग्णालयात उपचारासाठी दाखल केले. तसेच श्री. सोनकुसरे व त्यांच्या मुलांची वैद्यकीय तपासणी करण्यासाठी आरोग्य विभाग पथक उपोषणस्थळी दाखल झाले होते.