स्मार्ट वीज मीटर बसवण्यास
विजयदुर्गात ग्राहकांचा विरोध

सादिक धोपावकर; महावितरणने नोंद घ्यावी

सकाळ वृत्तसेवा
देवगड, ता. ६ ः महावितरणच्या स्मार्ट वीज मीटर बसवण्यास विजयदुर्ग भागातील नागरिकांचा आक्षेप आहे. स्मार्ट मीटर बसवण्यास ग्राहकांचा तीव्र विरोध असून महावितरणने याची नोंद घ्यावी, असे आवाहन विजयदुर्ग येथील सामाजिक कार्यकर्ते सादिक धोपावकर यांनी केले आहे. याबाबत महावितरणला कळविणार असल्याचेही त्यांनी सांगितले.
श्री. धोपावकर यांनी दिलेल्या माहितीनुसार, सध्या महावितरणकडून जुने वीज मीटर काढून स्मार्ट मीटर बसविण्याची मोहीम सुरू आहे. ज्या ठिकाणी असे मीटर बसविण्यात आले, त्यांना भरमसाट वीज बील आल्याने ग्राहक हैराण झाल्याचे समजते, असा दावा श्री. धोपावकर यांनी करून सध्याचे मीटर चांगले चालत असताना स्मार्ट मीटरची जबरदस्ती कशाला० असा संतप्त प्रश्‍न स्थानिक नागरिकांमधून उपस्थित केला जात असल्याचे त्यांचे म्हणणे आहे. जिल्ह्याच्या विविध भागात याबाबतचा उद्रेक, उठाव दिसून आला. त्यामुळे अशा प्रकारचे मीटर कदापी बसवू देणार नाही, असा इशारा श्री. धोपावकर यांनी दिला आहे. या भूमिकेला सामाजिक कार्यकर्ते दिलदार चौगुले, संतोष बांदिवडेकर, जितू बिर्जे, बबन घाटये, हसन चौगुले, संतोष मणचेकर, दामाजी पाटील आदींचा पाठिंबा असल्याचा दावाही त्यांनी केला आहे. सध्याच्या वाढत्या वीज आकाराने नागरिक हतबल झाले आहेत. याचा विचार करून कोणत्याही परिस्थितीत स्मार्ट मीटर बसविण्यास ग्राहकांचा विरोध असल्याचे धोपावकर यांचे म्हणणे आहे. याबाबत महावितरणशी पत्रव्यवहार करून स्मार्ट मीटर बसविण्याची सक्ती करू नये, असे आवाहन करणार असल्याचेही त्यांनी सांगितले.