82608

शाळेचा रस्ता आहे की गटार?

बांधकरवाडीत सांडपाण्याची समस्या; विद्यार्थ्यांचे आरोग्य धोक्यात

कणकवली, ता. ६ ः शहरातील बांधकरवाडी येथील शाळा क्रं.२ च्या ये जा करण्याच्या रस्त्यावर तेथील एका घरातून सांडपाणी सोडण्यात आले आहे. या सांडपाण्याचा विद्यार्थ्यांसह पालकांना मोठा त्रास सहन करावा लागत आहे. त्‍यामुळे शाळेचा रस्ता आहे की गटार, असा संतप्त प्रश्‍न पालकांकडून उपस्थित होत आहे. तसेच सांडपाण्याचा बंदोबस्त करावा, अशी मागणी पालक आणि नागरिकांनी नगरपंचायत प्रशासनाकडे केली आहे.
बांधकरवाडीतील रेणुका पवार, सुनीता गुप्ता, अंबिका कोळी, मिताली घाडीगावकर, निधी मेस्त्री, मनीषा वायंगणकर, मंगल महाडिक, निलम कोरगावकर यांच्यासह सुमारे ३८ नागरिकांनी आज नगरपंचायतीचे प्रशासकीय अधिकारी अमोल अघम यांची भेट घेऊन त्‍यांना निवेदन दिले.
या निवेदनात म्‍हटले आहे की, शहरातील शाळा क्रं.२ मधील अंगणवाडी इमारतीच्या पुढे असलेल्‍या एका चाळीतील सांडपाणी शाळेत येण्या- जाण्याच्या रस्त्यावर सोडले आहे. बांधकरवाडी, परबवाडी, मधलीवाडीतील विद्यार्थ्यांना शाळेत येण्या-जाण्यासाठी हाच रस्ता आहे. या रस्त्यावर दिवसभर सांडपाणी वाहत असल्‍याने विद्यार्थ्यांच्या आरोग्‍याला धोका आहे. त्‍यामुळे संबधित इमारत मालकाला सांडपाणी अन्यत्र निचरा करण्याबाबत निर्देश द्यावेत अथवा नगरपंचायतीने तेथील सांडपाण्याचा निचरा करावा.
-----
साथीच्या आजाराची भीती व्यक्त
सध्या पावसाळा असल्‍याने साथीचे आजार वाढत आहेत. यात येण्या-जाण्याच्या दत्तमंदिर रोड ते शाळा क्रं.२ या संपूण मार्गावर हे सांडपाणी आहे. त्‍याचा तेथील रहिवाशांनाही त्रास सहन करावा लागत आहे. त्‍यामुळे सांडपाणी निचरा करण्याबाबत योग्‍य कार्यवाही करावी, असे पालकांनी निवेदनात नमूद केले आहे.