बेपत्ता महिलेचा सांगाडा
झरेवाडी येथे सापडला
सकाळ वृत्तसेवा
रत्नागिरी ः तालुक्यातील कापडगाव-कोत्रेवाडी येथील बेपत्ता झालेल्या महिलेचा सांगाडा झरेवाडी येथील पठारावर सापडला. पोलिसांकडे सांगाड्याच्या कपड्यावरून खात्री झाल्याची नोंद ग्रामीण पोलिस ठाण्यात करण्यात आली आहे. पूनम महादेव कोत्रे (वय ३८, रा. कापडगाव-कोत्रेवाडी, रत्नागिरी) असे मृत महिलेचे नाव आहे. ही घटना मंगळवारी (ता. ५) सकाळी सव्वादहाच्या सुमारास पेजे पठाराच्या खालच्या बाजूला झरेवाडी पठारावर निदर्शनास आली. पोलिसांकडून मिळालेल्या माहितीनुसार, पूनम कोत्रे या कापडगाव येथील घरातून निघून गेल्या होत्या. याबाबत ग्रामीण पोलिस ठाण्यात बेपत्ता झाल्याची नोंद करण्यात आली होती. त्यांचा मृतदेह सांगाळी तालुक्यातील पेजे पठाराच्या खालच्या बाजूला झरेवाडी पठारावर आढळला. पोलिसांनी घटनास्थळी जाऊन पाहणी केली असता तिच्या कपड्यावरून ती पुनम कोत्रे हिच्या मृतदेहाचा सांगडा असल्याची खात्री झाली. या प्रकरणी ग्रामीण पोलिस ठाण्यात आकस्मिक मृत्यूची नोंद करण्यात आली आहे.
----------
मटका जुगारावर छापा
रत्नागिरी ः देवरूख बाजारपेठ (ता. संगमेश्वर) येथे पोलिसांनी मटका जुगारावर कारवाई केली. या कारवाईत साहित्यासह ७०२ रुपयांचा मुद्देमाल जप्त केला. देवरूख पोलिस ठाण्यात संशयितांविरुद्ध गुन्हा दाखल करण्यात आला आहे. संजय दत्ताराम साबळे (वय ४६, रा. देवरूख बागवाडी, ता. संगमेश्वर) असे संशयिताचे नाव आहे. ही घटना मंगळवारी (ता. ५) दुपारी निदर्शनास आली. या प्रकरणी पोलिस हेडकॉन्स्टेबल अभिषेक वेलणकर यांनी देवरूख पोलिस ठाण्यात तक्रार दिली.
----------
वाहतुकीस अडथळा
करणाऱ्यावर गुन्हा
रत्नागिरी ः वाहतुकीस व रहदारीस अडथळा होईल, असे वाहन पार्क करणाऱ्या संशयित चालकाविरुद्ध देवरूख पोलिस ठाण्यात गुन्हा दाखल करण्यात आला आहे. दगडू केशव चौगुले (वय ५६, रा. मलकापूर, ता. शाहूवाडी, पोलिस ठाणे, जि. कोल्हापूर) असे संशयित चालकाचे नाव आहे. ही घटना मंगळवारी (ता. ५) दुपारी चारच्या सुमारास वायंगणे ते वायवणे नालेवाडी जाणाऱ्या सार्वजनिक रस्त्यावर निदर्शनास आली. पोलिसांकडून मिळालेल्या माहितीनुसार, दगडू चौगुले यांनी मालवाहू गाडी ही वायंगणे ते वायवणे रस्त्यावर रहदारीस व वाहतुकीस अडथळा होईल, अशी पार्क केली. या प्रकरणी पोलिस कॉन्स्टेबल सचिन लगारे यांनी देवरूख पोलिस ठाण्यात तक्रार दिली.