शिरोडा नाणोस बसची वेळ बदला
पालकांची मागणी ः सावंतवाडी, वेंगुर्ले आगारांना निवेदन
सकाळ वृत्तसेवा
सावंतवाडी, ता. १० ः नाणोस येथील शालेय आणि महाविद्यालयीन विद्यार्थ्यांना शिरोडा येथील अ. वि. बावडेकर विद्यालय तथा बा. म. गोगटे कनिष्ठ महाविद्यालयात शिक्षणासाठी जावे लागते. हा प्रवास एक ते दीड तासांचा असून एसटी नसल्याने सुमारे अडीच तास पायी प्रवास विद्यार्थ्यांना करावा लागतो. त्याचा परिणाम त्यांच्या शिक्षणावर होत आहे. ही विद्यार्थ्यांची अडचण दूर करण्यासाठी एसटी बस नाणोस गावात सकाळी अर्धा तास अगोदर यावी व सायंकाळी अर्धा तास उशिरा शिरोडा येथून सोडण्यात यावी, अशी मागणी नाणोस येथील पालकांनी एसटी आगाराकडे केली.
याबाबत दिलेल्या निवेदनात म्हटले आहे की, नाणोस रेडीगाव येथील विद्यार्थी शिक्षणासाठी शिरोडा येथे जातात; पण एसटी बसची येण्याची व शिरोडा येथून सुटण्याची वेळ लवकर असल्याने या विद्यार्थ्यांना या बसमधून जाता येत नाही. त्यामुळे पायी प्रवास करावा लागतो. सुमारे अडीच तास पायी प्रवास करावा लागत असल्याने त्याचा परिणाम शिक्षणावर होऊन शैक्षणिक नुकसान होत आहे. या मार्गावरून पायी प्रवास करताना भटके कुत्रे, सरपटणारे प्राणी यांचाही मोठा धोका आहे. त्यामुळे या एसटीच्या वेळेत बदल करावा, अशी मागणी पालकांनी सावंतवाडी व वेंगुर्ले आगाराकडे केली.
या निवेदनावर किशोर नाणोसकर, कीर्ती नाणोसकर, नितीन नाणोसकर, विद्या नाणोसकर, सुधाकर नाणोसकर, अमिता नाणोसकर, सखाराम जोशी, समिता जोशी, सरिता जोशी, संजय जोशी यांच्या सह्या आहेत. पालकांच्या या मागणीचा विचार केला जाईल, असे एसटी प्रशासनाकडून सांगण्यात आले.