ज्येष्ठ नागरिक विकास मंचतर्फे
बांद्यात सोमवारी आरोग्य शिबिर
सकाळ वृत्तसेवा
बांदा, ता. १२ ः कोकण कॅन्सर ॲण्ड मल्टिस्पेशालिटी हॉस्पिटल, मातृत्व मेडिकल, रोटरी क्लब ऑफ बांदा आणि ज्येष्ठ नागरिक विकास मंच यांच्या संयुक्त विद्यमाने बांदा येथे मोफत आरोग्य शिबिराचे आयोजन करण्यात आले आहे. हे शिबिर सोमवारी (ता. १८) सकाळी ९.३० ते दुपारी २ या वेळेत मातृत्व मेडिकल, बांदा येथे होणार आहे. शिबिरात विविध प्रकारच्या कॅन्सरची तपासणी व निदान, सर्व प्रकारांच्या गाठींची तपासणी, हर्निया, हायड्रोसील, अपेंडिक्स तपासणी, पोट व आतड्यांची तपासणी, अतिजोखमीच्या शस्त्रक्रियांबाबत माहिती, मूत्रविकार व किडनी तपासणी, जनरल तपासणी, किमोथेरपी मार्गदर्शन, लहान-मोठ्या शस्त्रक्रियांसंबंधी तपासण्या, गर्भाशय व गर्भाशयातील गाठी तपासणी, प्रजननक्षमता वाढविण्यासाठी तपासण्या, कुटुंब नियोजन शस्त्रक्रिया मार्गदर्शन, पिशवी काढणे व बिनटाका शस्त्रक्रियेसाठी मार्गदर्शन, प्रोलॅप्स सर्जरी निदान, स्त्रियांच्या आजारांवरील तपासण्या आणि प्रसूतीपूर्व तपासण्या करण्यात येणार आहेत. आवश्यक शस्त्रक्रियांसंदर्भात माहिती दिली जाणार असून, शिबिराच्या ठिकाणी कोणतीही शस्त्रक्रिया केली जाणार नाही, अशी माहिती आयोजकांनी दिली. शिबिरात डॉ. आदेश पालयेकर (कर्करोग तज्ज्ञ), डॉ. गायत्री पालयेकर (स्त्रीरोग व प्रसूती तज्ज्ञ) आणि डॉ. कौस्तुभ वैद्य (जननेंद्रिय व मूत्र शल्यचिकित्सक) तपासणी व मार्गदर्शन करणार आहेत. शिबिराला येताना रुग्णांनी आपले जुने वैद्यकीय रिपोर्ट सोबत आणावेत, असे आवाहन आयोजकांनी केले आहे. अधिक माहितीसाठी विराज परब, शिवानंद भिडे, मंदार कल्याणकर, गुरुनाथ नार्वेकर, नीलेश मोरजकर, दीपक सावंत, सचिन घाडीगावकर यांच्याशी संपर्क साधावा. या शिबिराला पुरुष आणि महिलांनी मोठ्या संख्येने सहभागी व्हावे, असे आवाहन रोटरी क्लब तसेच ज्येष्ठ नागरिक विकास मंच बांदा यांनी केले आहे.