84011

भंडारी हायस्कूलमध्ये ‘वृक्ष रक्षाबंधन’
मालवण : येथील भंडारी ए. सो. हायस्कूलच्या विद्यार्थ्यांनी रक्षाबंधनाचे औचित्य साधून प्रशालेसमोर ‘वृक्ष रक्षाबंधन’ हा अभिनव उपक्रम राबविला. यावेळी विद्यार्थ्यांनी वृक्षाला राखी बांधून पर्यावरण संवर्धनाचा संदेश दिला. जशी बहीण भावाला राखी बांधून त्यांच्याकडून रक्षणाची हमी घेते, तशीच झाडांना राखी बांधून त्यांचे संरक्षण करण्याची जबाबदारी भंडारी हायस्कूलच्या मुलांनी घेतली. वृक्षतोड थांबविणे, हिरवाई वाढविणे, समाजामध्ये झाडांचे महत्त्व पटवून देणे, झाडांना सजीव मानून त्यांच्याशी आपुलकीचे नाते जपणे असे पर्यावरणाचे संदेश पसरवणे व यांची समाजात व मुलांमध्ये जाणीव जागृती हा उद्देश या उपक्रमांमध्ये होता. यावेळी मुलांनी पर्यावरणपूरक साहित्य वापरून आकर्षक राख्या बनविल्या व झाडांना रक्षाबंधन केले. झाडांचे रक्षण करू, अशी शपथ घेतली. मुख्याध्यापक एच. बी. तिवले, पर्यवेक्षक आर. डी. बनसोडे, सहाय्यक शिक्षक संदीप अवसरे, आयबीटी विभागाच्या केशव भोगले, जगन्नाथ आंगणे, नेहा गवंडे, दर्शना मयेकर आदी उपस्थित होते.
---
84010

‘अभाविप’तर्फे पोलिस, स्वच्छतादूतांना राखी
ओटवणे ः अखिल भारतीय विद्यार्थी परिषदेच्या सावंतवाडी शाखेच्या वतीने रक्षाबंधनानिमित्त येथील पोलिस ठाण्यातील पोलिस कर्मचारी आणि सावंतवाडी उपजिल्हा रुग्णालयातील आरोग्य कर्मचाऱ्यांना रक्षाबंधन केले. यावेळी पोलिस कर्मचाऱ्यांनी समाजरक्षण तर आरोग्य कर्मचाऱ्यांनी स्वास्थ्य रक्षणाचे वचन दिले. अखिल भारतीय विद्यार्थी परिषदेच्या या अनोख्या रक्षाबंधनाने पोलिस कर्मचारी भारावून गेले. यावेळी विद्यार्थी परिषदेचे सावंतवाडी शहर प्रमुख ज्ञानेश्वर गवळी, जिज्ञासा संयोजक स्नेहा धोटे, तेजल कित्तुरे, उत्तरा पेडणेकर, प्रतीक्षा चन्ने आदी उपस्थित होते.