84030

सावंतवाडीत ‘तिरंगा’ रॅली;
‘वंदे मातरम्’चा नारा...

मानवी साखळीतून एकतेचा संदेश

सकाळ वृत्तसेवा
सावंतवाडी, ता. १२ ः ‘भारत माता की जय’, ‘वंदे मातरम्’च्या घोषणांनी आज सावंतवाडी शहर परिसर दुमदुमला. ‘हर घर तिरंगा’ अभियान अंतर्गत काढलेल्या तिरंगा दुचाकी रॅलीला तरुणांसह शहरवासीयांचा उत्स्फूर्त प्रतिसाद मिळाला. या रॅलीमुळे शहरात देशभक्तीचे वातावरण निर्माण झाले होते.
भारताच्या स्वातंत्र्य दिनानिमित्त केंद्र आणि राज्य सरकारने सुरू केलेल्या ‘हर घर तिरंगा-घरोघरी तिरंगा’ अभियानांतर्गत सावंतवाडी नगरपरिषदेने शहरात देशभक्तीचे वातावरण निर्माण करण्यासाठी विविध उपक्रम आयोजित केले आहेत. याचाच एक भाग म्हणून आज शहरात भव्य तिरंगा दुचाकी रॅलीचे आयोजन केले होते. सकाळी येथील जनरल जगन्नाथराव भोसले स्मृती शिवउद्यान येथून रॅलीला सुरुवात झाली. मानवी साखळी तयार करून एकता व बंधुतेचा संदेश देण्यात आला. शिवउद्यानातील कर्मचाऱ्यांनी विटा रचून आणि फुलांची आकर्षक सजावट करून अनोखी ‘तिरंगा’ थीम तयार केली होती. गजानन परब यांनी सूत्रसंचालन केले.