84701

कुडाळात उद्या रानभाजी महोत्सव

प्रफुल्ल वालावलकर ः पंचायत समितीचा उपक्रम

कुडाळ, ता. १६ ः येथील पंचायत समितीतर्फे मंगळवारी (ता. १९) सकाळी १० वाजता रानभाजी पाककला स्पर्धा व महोत्सवाचे आयोजन करण्यात आल्याची माहिती गटविकास अधिकारी प्रफुल्ल वालावलकर यांनी दिली. पंचायत समितीमध्ये वालावलकर यांनी पत्रकार परिषद घेतली. यावेळी मृणाल कार्लेकर, कृषी विस्तार अधिकारी संदेश परब, महादेव खरात, सोनिया पालव तसेच लघु पाटबंधारे विभागाचे मंगेश हवालदार उपस्थित होते.
यावेळी वालावलकर यांनी या महोत्सवाची माहिती दिली. हा महोत्सव पंचायत समितीच्या अल्पबचत सभागृहात होणार आहे. रानभाज्यांची उपयुक्तता व त्यापासून तयार होणाऱ्या पाककलांची माहिती व्हावी, या हेतूने या महोत्सवाचे आयोजन केले आहे. या महोत्सवाचे स्वरुप स्पर्धात्मक असून उत्कृष्ट पाककलाकृतींना पारितोषिके दिली जाणार आहेत. महोत्सवात बचतगटांच्या महिला सहभागी होतील. एकूण नऊ प्रभागातून तीन महिला सहभागी होणार आहेत. आंगणवाडीसाठी आठ बिट असून दोन सेविका किंवा मदतनीस सहभागी होतील. पंचायत समितीचे अधिकारी व कर्मचारी सहभागी होणार आहेत. स्पर्धा कुडाळ तालुका मर्यादित आहे. ज्या भाजीचा पदार्थ बनविणार आहे, त्या भाजीचा मूळ नमुना, पाककृती (लिखित स्वरुपात) सोबत आणणे व पाककृतीसोबत ठेवणे आवश्यक आहे. पदार्थ मांडणीची सुरुवात सकाळी ९ वाजता होणार आहे. प्रथम येणाऱ्या ३ स्पर्धकांना प्रमाणपत्र व सन्मानचिन्ह देण्यात येणार आहे. इच्छुकांनी नावे आपल्या विभागामार्फत कृषी विभाग, पंचायत समिती कुडाळ यांच्याकडे सोमवारपर्यंत (ता. १८) द्यावी. अधिक माहितीसाठी सोनिया पालव, विस्तार अधिकारी (कृषी) किंवा संदेश परब, विस्तार अधिकारी यांच्याशी संपर्क साधावा.