84706

स्वच्छता दूत हेच शहराचे खरे हिरो

शैलेश पै ः सावंतवाडीत १०० कंत्राटी सफाई कामगारांचा सत्कार

सकाळ वृत्तसेवा
सावंतवाडी, ता. १६ ः स्वातंत्र्य दिनाचे औचित्य साधून सामाजिक बांधिलकी प्रतिष्ठानने नगरपरिषद आणि उपजिल्हा रुग्णालयातील १०० कंत्राटी सफाई कामगारांचा सत्कार करून त्यांना शिधा वाटप केले. समाजासाठी अहोरात्र झटणाऱ्या विविध क्षेत्रांतील व्यक्तींचा गौरव करत संस्थेने कृतज्ञता सोहळा यशस्वीरीत्या पार पाडला. ‘स्वच्छता दूत हेच शहराचे खरे हिरो आहेत’, असे गौरवोद्‌गार याप्रसंगी संस्थेचे सल्लागार शैलेश पै यांनी काढले.
​ या कार्यक्रमात महिला सफाई कामगारांना ‘मायेची साडी’ देण्यात आली, तर दिव्यांग विद्यार्थ्यांसाठी संस्थेच्या रुपा गौंडर (मुद्राळे) यांनी स्वखर्चाने भेटवस्तू दिल्या. ​गेली ४० वर्षे सामाजिक क्षेत्रात कार्यरत असलेले ‘रेस्क्यू टीम’चे अध्यक्ष बाबल अल्मेडा यांचाही संस्थेमार्फत सत्कार केला. आरोग्य यंत्रणेत २४ तास सेवा देणाऱ्या १०८ रुग्णवाहिकेवरील डॉ. दानवे यांचाही विशेष गौरव झाला. याच रुग्णवाहिकेवरील धैर्यशील शिर्के, रामचंद्र निकम आणि बुधाजी जाधव यांचाही सत्कार करण्यात आला. ​​या सोहळ्यात २४ तास सेवा देणारे सिटीस्कॅन मॅनेजमेंटचे मॅनेजर प्रथमेश परब, दिव्यांग प्रशिक्षण केंद्र चालवणाऱ्या रूपाली पाटील, काळसे पंचक्रोशी अपंग संस्थेचे अध्यक्ष विनोद धुरी, संस्थेच्या सेवाभावी कार्यात हातभार लावणारे दानशूर व्यक्तिमत्त्व महालक्ष्मी सुपर बाजारचे मालक रामकृष्ण कोंडीयाल, चेतन बँगल स्टोअर्सचे मालक चेतन गुप्ता, सुराणा इंटरप्रायझेस यांच्यासह ​सावंतवाडी शहराचा मानबिंदू उंचावणारी अभिनेत्री, लेखिका व कवयित्री कल्पना बांदेकर, ज्येष्ठ नागरिक माजी अध्यक्ष अरुण मेस्त्री, संस्थेचे कार्यकर्ते लक्ष्मण कदम यांनाही गौरविण्यात आले.
​​गोविंद चित्र मंदिरचे चालक व कार्यक्रमाचे अध्यक्ष प्रा. सुभाष गोवेकर, प्रमुख पाहुणे शैलेश पै यांनी मार्गदर्शन केले. कार्यक्रमाच्या यशस्वीतेसाठी संस्थेचे अध्यक्ष बागवे, उपाध्यक्ष नाईक, सचिव समीरा खालील, कार्याध्यक्ष संजय पेडणेकर, सदस्य रुपा गौंडर, लक्ष्मण कदम, शेखर सुभेदार, श्यामराव हळदणकर, हेलन निबरे आणि रवी जाधव यांनी योगदान दिले. उपाध्यक्ष शैलेश नाईक यांनी सूत्रसंचालन केले. ​अध्यक्ष बागवे यांनी आभार मानले.
---
मान्यवरांकडून मनोगते व्यक्त
संस्थेचे अध्यक्ष सतीश बागवे यांनी, संकटात असलेल्या, अनाथांना, गरिबांना दिलेली ही सेवा अनंतकाळ टिकण्यासाठी कटिबद्ध आहोत, असे सांगितले. सफाई कामगार प्रतिनिधी बाबू बरागडे यांनी मनोगत व्यक्त केले. ​‘जिथे कमी, तिथे आम्ही’ या ब्रीदवाक्याप्रमाणे ही संस्था शहरात निःस्वार्थपणे काम करत आहे, असे उद्‌गार अभिनेत्री कल्पना बांदेकर यांनी काढले.