‘प्लास्टिकमुक्त चिपळूण’मधून जनजागृती
बुधवारी बक्षीस समारंभ ; मानाची पैठणी, सोन्याची नथ देणार
सकाळ वृत्तसेवा
चिपळूण, ता. १६ ः चिपळूण पालिकेतर्फे आयोजित ‘प्लास्टिकमुक्त चिपळूण’ या जनजागृती मोहिमेंतर्गत ‘होम मिनिस्टर’चा बक्षिस वितरण समारंभ २० ऑगस्टला सायंकाळी ५ ते ७ या वेळेत इंदिरा गांधी सांस्कृतिक केंद्रात होणार आहे.
सोहळ्याला पालकमंत्री उदय सामंत, आमदार शेखर निकम, अभिनेता आणि पालिकेचा स्वच्छतादूत ओंकार भोजने, अभिनेत्री वनिता खरात उपस्थित राहणार आहेत. कार्यक्रमात कुपनमधून निवडलेल्या लकी ड्रॉ विजेत्या महिलेला मानाची पैठणी प्रदान करण्यात येणार आहे. त्याच दिवशी विशेष ‘होम मिनिस्टर’ खेळाचे आयोजन असून, अंतिम विजेती महिला सोन्याच्या नथीची मानकरी ठरणार आहे. याशिवाय ‘राखणदार’ या कचरा व प्लास्टिकमुक्तीवर आधारित जनजागृती करणाऱ्या शॉर्टफिल्मचे सादरीकरण हे या कार्यक्रमातील विशेष आकर्षण असणार आहे.
उपक्रमाद्वारे प्लास्टिकमुक्त चिपळूणसाठी नागरिकांमध्ये जनजागृती करणे, पर्यावरण संरक्षणाबाबत सकारात्मक संदेश देणे आणि स्वच्छतेसाठी सक्रिय सहभागास प्रोत्साहन देणे हा उद्देश आहे. १५ जुलै ते १५ ऑगस्ट या कालावधीत ही स्पर्धा घेण्यात आली. नागरिकांनी कार्यक्रमाला उपस्थित राहावे, असे आवाहन मुख्याधिकारी विशाल भोसले, सह्याद्री निसर्गमित्र संस्थेचे संचालक भाऊ काटदरे, नाटक कंपनीचे अध्यक्ष मानस संसारे यांनी केले आहे.