कर्जाच्या आमिषाने फसवणूक
चव्हाण, खातू ः कारवाईची मागणी
सकाळ वृत्तसेवा
चिपळूण, ता. १९ ः जिल्हा उद्योगकेंद्राच्या माध्यमातून अनुदानावर कर्ज मिळवून देण्याच्या नावाखाली महिलांची आर्थिक फसवणूक करणाऱ्या महिलेस चिपळूण पोलिसांनी अटक केली. देवरूख, संगमेश्वर, चिपळूण, गुहागर, खेड, दापोली येथील अनेक महिला या आमिषाला फसल्या आहेत. संबंधित महिलेवर कठोर कारवाई करावी, अशी मागणी फसवणूक झालेल्या महिलांनी पत्रकार परिषदेत केली.
याबाबत भोम येथील रोहिणी चव्हाण, चिपळुणातील नेहा खातू म्हणाल्या, मुद्रा, पीएमजीपी, सीएमजीपी आदी शासकीय योजनेतून विविध उद्योगांसाठी ३५ टक्केपर्यंत अनुदानही उपलब्ध करून दिले जाते. १० लाखांचे कर्ज घेतल्यास साडेतीन लाखांचे अनुदान मिळते. संशयित मुक्सान अबुबकर सय्यद व तिचा पती अबुबकर सय्यद या दोघांनी कमी कागदपत्रांमध्ये महिलांना कर्ज मिळवून देण्याचे आमिष दाखवले. या कामाच्या मोबदल्यात ३० हजार ते १ लाखापर्यंतची रक्कम कर्ज हवे असणाऱ्यांकडून घेतले. दरम्यान, काही महिन्यांचा कालावधी लोटला तरी कर्ज मंजूर झाले नाही.
अखेर काहींनी थेट जिल्हा उद्योगकेंद्राचे अधिकारी, संबंधित बॅंकांचे अधिकारी यांच्याकडे चौकशी केली. त्या वेळी मुक्सान अबुबकर सय्यद हिच्याकडून फसगत झाल्याचे निदर्शनास आले. संबंधित महिलेला न्यायालयाने तिला १९ पर्यंत पोलिस कोठडी सुनावली.