85525

देवगडमध्ये वादळी वाऱ्यासह पाऊस
देवगड, ता. १९ ः तालुक्याच्या किनारी भागात पावसाने कहर केला आहे. वादळी वाऱ्यासह पाऊस चांगलाच झोडपून काढत आहे. चोवीस तासांत आज सकाळपर्यंत येथे १३१ मिलिमीटर इतका पाऊस झाला. सोमवारी (ता.१८) रात्रभर पावसाची रिपरिप सुरूच होती. यंदाच्या हंगामात पावसाने आतापर्यंत अडीज हजार मिलिमीटरचा टप्पा पार केला आहे. दरम्यान, पावसामुळे समुद्र खवळला असून, स्थानिक मासेमारीला ब्रेक लागला आहे.
चार दिवसांपासून पावसाने किनारी भागात जोर धरला आहे. अधूनमधून वादळी वाऱ्यासह जोरदार पावसाच्या सरी कोसळत आहेत. सोमवारी रात्री आणि आज दिवसभर किनारी भागाला चांगलेच झोडपून काढले. पावसामुळे अनेकांची कामे खोळंबली आहेत. समुद्र खवळला असून, किनारी भागात समुद्राची गाज वाढली आहे. पावसामुळे ग्रामीण भागात पुरसदृशस्थिती निर्माण झाली होती. नद्या नाले दुथडी भरून वाहत आहेत. चोवीस तासांत आज सकाळपर्यंत येथे १३१ मिलिमीटर इतका पाऊस झाला. यंदाच्या हंगामात आतापर्यंत २५२८ मिलिमीटर इतकी पावसाची नोंद झाली आहे. समुद्रातील वातावरण खराब असल्याने स्थानिक मासेमारी थंडावली आहे. त्यामुळे बाजारातील माशांची आवक कमी झाल्याचे चित्र होते. पावसाने बाजारपेठेत शांतता होती.