चर्चरोड येथील
हातभट्टीवर छापा
रत्नागिरी ः शहरातील पालिकेच्या बंद शाळेच्या मागील बाजूस हातभट्टीची दारू विक्री करणाऱ्यावर पोलिसांनी कारवाई केली. या कारवाईत ४५० रुपयांची चार लिटर दारू जप्त केली. शहर पोलिस ठाण्यात संशयितांविरुद्ध गुन्हा दाखल करण्यात आला आहे. नाझीम अहमद झारी (वय ६५, रा. जामा मशिदजवळ, झारणीरोड, रत्नागिरी) असे संशयिताचे नाव आहे. ही घटना सोमवारी (ता. १८) दुपारी अडीचच्या सुमारास आरसीचर्च रस्त्यावर पालिकेच्या बंद शाळेच्या मागील बाजूस निदर्शनास आली. या प्रकरणी पोलिस हेडकॉन्स्टेबल प्रमोद कांबळे यांनी शहर पोलिस ठाण्यात तक्रार दिली.

रेल्वे प्रवाशाचा
आकस्मिक मृत्यू
रत्नागिरी ः सीएसटी मेंगलोर रेल्वेने प्रवास करणाऱ्या मालवण येथील प्रौढाची तब्येत अचानक बिघडली. बेशुद्धावस्थेत त्याला जिल्हा शासकीय रुग्णालयात दाखल केले. तेथील वैद्यकीय अधिकाऱ्यांनी त्यांना तपासून मृत घोषित केले. संजय गोपाळ कोळंबकर (वय ४७, रा. मिऱ्याबांध-मालवण, जि. सिंधुदुर्ग) असे मृत प्रौढाचे नाव आहे. ही घटना सोमवारी (ता. १८) सकाळी घडली. शहर पोलिस ठाण्यात आकस्मिक मृत्यूची नोंद करण्यात आली आहे.

पावस-तांबळवाडीतील
वृद्धाची आत्महत्या
पावस ः येथील पावस-तांबळवाडी येथे भाड्याच्या चाळीत राहणाऱ्या वृद्धाने लोखंडी बारला गळफास घेऊन आत्महत्या केली. पूर्णगड सागरी सुरक्षा पोलिस ठाण्यात आकस्मिक मृत्यूची नोंद करण्यात आली आहे. भिकाजी रंगराव रसाळ (वय ६०, रा. तोडणकर यांची चाळ, पावस-तांबळवाडी, रत्नागिरी) असे मृत वृद्धाचे नाव आहे. ही घटना सोमवारी (ता. १८) दुपारी साडेतीन वाजण्याच्या सुमारास निदर्शनास आली. पोलिसांकडून मिळालेल्या माहितीनुसार, रसाळ यांनी अज्ञात कारणातून भाड्याच्या खोलीत दोन्ही दरवाजांना आतून कडी लावून छताच्या लोखंडी बारला नायलॉनची दोरी बांधून गळफास घेऊन आत्महत्या केली.