85637

स्केटिंग स्पर्धेत
सृष्टी दिघेचे यश
मालवण : ओरोस येथे झालेल्या जिल्हास्तरीय रोलर स्केटिंग स्पर्धेत १९ वर्षांखालील मुलींच्या गटात येथील भंडारी एज्युकेशन सोसायटी कनिष्ठ महाविद्यालयाची बारावी वाणिज्य शाखेतील विद्यार्थिनी सृष्टी दिघे हिने प्रथम क्रमांक पटकावला. या यशामुळे तिची विभागस्तरीय स्पर्धेसाठी निवड झाली आहे. सृष्टीच्या या उल्लेखनीय यशाबद्दल भंडारी एज्युकेशन सोसायटीचे अध्यक्ष विजय पाटकर, चेअरमन सुधीर हेरेकर, ऑनररी जनरल सेक्रेटरी साबाजी करलकर, मुख्य कार्यकारी अधिकारी वामन खोत, इतर पदाधिकारी, प्रा. हणमंत तिवले, सर्व प्राध्यापक, शिक्षक व शिक्षकेतर कर्मचाऱ्यांनी अभिनंदन केले.
---
अंत्यसंस्कारावेळी
मुलाचा झाला मृत्यू
देवरूख ः आईच्या निधनाचे दुःख असह्य झाल्याने एका मुलाचा तिच्याच अंत्यसंस्कारावेळी हृदयविकाराच्या झटक्याने मृत्यू झाल्याची दुर्दैवी घटना संगमेश्वर तालुक्यातील मेढेतर्फे देवळे येथे घडली आहे. अभिजित जयवंत मेढे (वय ४२, रा. मेढेतर्फे देवळे) यांच्या आईचे १६ ऑगस्टला निधन झाले होते. १७ ऑगस्टला सकाळी त्यांच्या आईच्या अंत्यसंस्काराचा कार्यक्रम सुरू असताना, अभिजित यांना अचानक चक्कर आली. नातेवाइकांनी त्यांना तत्काळ साखरपा येथील प्राथमिक आरोग्यकेंद्रात दाखल केले; मात्र उपचारादरम्यान डॉक्टरांनी त्यांना मृत घोषित केले. डॉक्टरांनी दिलेल्या माहितीनुसार, हृदयविकाराच्या तीव्र झटक्याने त्यांचा मृत्यू झाला असावा, असा प्राथमिक अंदाज आहे.
--
अणुस्कुरा घाटातील
वाहतूक दोन तास ठप्प
राजापूर : मुसळधार पावसामुळे अणुस्कुरा घाटात मंगळवारी (ता. १९) सकाळी दरड कोसळली. सार्वजनिक बांधकाम विभागाने जेसीबीच्या सहाय्याने रस्त्यामध्ये पडलेली दरड हटवली. त्यामुळे घाटमार्गातील ठप्प झालेली वाहतूक सुमारे दोन तासानंतर पुन्हा एकदा पूर्ववतपणे सुरू झाली आहे. गेल्या दोन दिवसांपासून तालुक्यात संततधार सुरू आहे. आंबा घाटात सोमवारी दरड कोसळल्याने साखरपामार्गे जाण्याऐवजी अनेक वाहनचालकांकडून अणुस्कुरा घाटमार्गे जाण्याला अधिक पसंती होती. मात्र मंगळवारी घाटात मोठे दगड आणि माती खाली आली. त्यामुळे घाटमार्गातून सुरू असलेली वाहतूक ठप्प झाली होती. घाटात दरड कोसळल्याची माहिती मिळताच सार्वजनिक बांधकाम विभागाने तत्काळ उपाययोजना हाती घेतल्या. त्यामध्ये जेसीबीच्या साह्याने रस्त्यामध्ये कोसळलेली दगड आणि माती बाजूला करण्यात बांधकाम विभागाला यश येऊन रस्ता वाहतुकीसाठी मोकळा झाला.
---
गुळदुवे येथील हरिनाम
सप्ताहाची आज सांगता
आरोंदा ः गुळदुवे येथील जागृत देवस्थान श्री विरेश्वर मंदिरात आजपासून हरिनाम सप्ताहास प्रारंभ झाला. या सप्ताहाची सांगता उद्या (ता. २०) होणार आहे. याचा सर्वांनी लाभ घेण्याचे आवाहन गुळदुवे ग्रामस्थांनी केले आहे.