‘ती’ मोटार चालकाच्या मैत्रिणीची
पिंपळी अपघातापूर्वी वाद; गाडीतून टाकली तिने उडी
सकाळ वृत्तसेवा
चिपळूण, ता. २१ ः चिपळूण-कऱ्हाड मार्गावरील पिंपळीखुर्द येथील वाशिष्ठी दूध डेअरी परिसरात एका भरधाव वेगातील मोटारीने प्रवासी रिक्षाला धडक दिल्याने झालेल्या भीषण अपघातात पाचजण जागीच ठार झाल्याची घटना सोमवारी रात्री १० वाजण्याच्या सुमारास घडली. यातील मृत आसिफ हकिमुद्दीन सैफी (२८, डेहराडून-उत्तराखंड) चालवत असलेली मोटार त्याच्या मैत्रिणीच्या मालकीची असल्याचे पोलिस तपासात पुढे आले आहे. दरम्यान, मृत आसिफचा मृतदेह बुधवारी रात्री उशिरा नातेवाइकांच्या ताब्यात देण्यात आला.
आसिफ सैफी हा त्याच्या मैत्रिणीसोबत पुणे येथे जात असताना चिपळूणमध्ये येताच त्या दोघांमध्ये चालत्या गाडीमध्ये वाद झाला. या वेळी ती गाडीतून मदतीसाठी ओरडत होती. वाद विकोपाला गेल्याने तिने महामार्गावरील शहरातील रावतळे येथे चालत्या मोटारीतून उडी मारली. पोलिसांनी त्या तरुणीला पोलिस ठाण्यात आणले. बुधवारी ती पोलिस ठाण्यातच होती. चिपळुणात तिचा भाऊ दाखल झाला असून, ती तरुणी गोवा येथे शिक्षण घेत असल्याचे समोर आले आहे. बुधवारी अपघाताच्या ठिकाणाहून ट्रक आणि मोटार दोन्ही वाहने हटवण्यात आली. रिक्षाचा सांगडा मात्र तिथेच होता.
अपघातातील रिक्षाचालक इब्राहिम इस्माईल लोणे (६२, पिंपळी नुराणी मोहल्ला) यांचा गुरूवारी सायंकाळी मोहल्ल्यातील कब्रस्तानामध्ये दफनविधी झाला. रिक्षातील प्रवासी नियाज महंमद हुसेन सय्यद (५०), शबाना नियाज सय्यद (४०) व हैदर नियाज सय्यद (४, सर्व रा. पर्वती, पुणे) यांचे मृतदेह त्यांच्या नातेवाइकांच्या ताब्यात देण्यात आले. सय्यद कुटुंबीयांनी गुरूवारी त्यांच्या कुटुंबीयांचे मृतदेह पुण्याला नेले.