धावत्या टँकरमधून ‘एलपीजी’ची गळती

अन्य वाहनधारकांचे प्रसंगावधान; दुर्घटना टळली

पाली, ता. २१ : मुंबई-गोवा राष्ट्रीय महामार्गावर गुरुवारी दुपारी १ वाजण्याच्या सुमारास चरवेली ते कापडगावदरम्यान जयगडहून कर्नाटककडे जाणाऱ्या एलपीजी गॅसटँकरमधून अचानक गॅसची गळती झाल्याने परिसरात घबराट पसरली. महामार्गावर चालत्या टँकरमधून होणारी गॅसची गळती चालकाला मागून येणाऱ्या वाहनचालकांने प्रसंगावधान दाखवत ते लक्षात आणून दिली. त्यानंतर महामार्गावर टँकर थांबवला व काही वेळाने गॅस गळती थांबल्याने मोठी दुर्घटना टळली. एलपीजी वाहतुकीची प्रशासनाने गांभीर्याने दखल घेऊन योग्य त्या उपाययोजना करण्याची मागणी होत आहे.
याबाबत घटनास्थळावरून मिळालेली माहिती अशी की, मुंबई-गोवा राष्ट्रीय महामार्गावर आज दुपारी एक वाजण्याच्या सुमारास जयगडवरून कर्नाटकच्या दिशेने एलपीजी गॅस वाहतूक करणारा टँकर चालला होता. चरवेली, कापडगाव या दरम्यान आला असता त्याच्या टाकीच्या आतील एलपीजी गॅसचा दाब उष्णतेमुळे वाढल्यामुळे आतील गॅस ओव्हरफ्लो होऊन टाकीच्या वरील भागात असणाऱ्या गॅसपाईपमधून अचानक बाहेर येऊ लागला. यावेळी हा टँकर महामार्गावर प्रवास करत होता. त्यामुळे ही घटना गॅस टँकरचालकाच्या मागून येणाऱ्या काही वाहनचालकांनी थांबवून लक्षात आणून दिली. त्यानंतर टँकर रस्त्यालगत थांबविल्यावर जवळपास अर्ध्या तासाने आतील गॅसचा दाब कमी झाल्यावर गॅस बाहेर येणे बंद झाले.
यावेळी परिसरात गॅसची मोठ्या प्रमाणात दुर्गंधी पसरलेली होती; परंतु या परिसरात मानवीवस्ती नसल्याने मोठी दुर्घटना घडली नाही. यानंतर घटनास्थळी संबंधित गॅस वाहतूक करणाऱ्या कंपनीचे प्रतिनिधी आल्यावर त्यांनी टँकरची टाकी आज असणाऱ्या उन्हामुळे आतील गॅसचे तापमान वाढल्यामुळे गॅस आपोआप ओव्हरफ्लो होऊन बाहेर आल्याचे सांगितले. त्यानंतर त्यांनी आता कोणताही धोका नसल्याचे सांगून टँकरवर थंड पाणी मारून आतील गॅसचे तापमान कमी होईल, असे सांगून वाहतुकीसाठी मार्गस्थ होऊ शकतो, असे सांगितले. त्यानंतर टँकर मार्गस्थ झाला.
यावेळी घटनास्थळी तत्काळ रत्नागिरी ग्रामीण पोलिस ठाण्याचे निरीक्षक राजेंद्र यादव, पाली पोलिस दूरक्षेत्राचे पोलिस उपनिरीक्षक मोहन कांबळे यांनी तातडीने येऊन सुरक्षिततेच्या उपाययोजना करत परिस्थिती हाताळली. याचबरोबर महामार्ग पोलिस मदतकेंद्र हातखंबाच्या पोलिस कर्मचाऱ्यांनी येऊन वाहतूक कोंडी होणार नाही, याची खबरदारी घेतली.
----------
चौकट
कठोर उपाययोजनांची गरज
कापडगाव गॅस टँकर ओव्हरफ्लो प्रकरणात ज्या प्रकारे चालत्या टँकरमधून गॅस बाहेर येत होता, त्यावेळी त्याच्या संपर्कात कोणतीही ज्वालाग्रही वस्तू आली नाही. त्यामुळे मोठी दुर्घटना टळली. या टँकरची गॅस वहनक्षमता १२ टन असताना टाकीमध्ये जवळपास ११ हजार ७६० टन इतका पूर्णपणे गॅस भरलेला होता. त्यामुळे प्रवासामध्ये हलून किंवा उष्णता, तसेच अन्य बाबींमुळे त्याचे टाकीतील तापमान वाढून तो थेट ओव्हरफ्लो होऊन बाहेर आला. अशा कंत्राटदार वाहतूक कंपनीच्या निष्काळजीपणामुळे गॅस वाहतूक करताना महामार्गावर मोठी जीवितहानीची दुर्घटना घडू शकते. याबाबतीत शासनाने कठोर निर्णय तातडीने घेऊन उपाययोजना करण्याची वेळ आली आहे.
-----------------
कोट
एलपीजी गॅस टॅंकरमधून गॅस गळती नव्हे, तर ती उष्णतेने टाकीतील प्रेशर वाढल्यामुळे ओव्हरफ्लो झालेली हवा (एअर) व्हॉल्व्हमधून बाहेर पडत होती. जेव्हा प्रेशर कमी झाला तेव्हा ती आपोआप थांबली आणि मग योग्य तपासणी करून टॅंकर सोडण्यात आला.
- राजेंद्र यादव, ग्रामीण पोलिस निरीक्षक