-rat21p40.jpg
86187
रत्नागिरी : जिल्हाधिकाऱ्यांच्या दालनात जिल्हास्तरीय जैवविविधता व्यवस्थापन समितीची बैठक झाली.

आंजर्ले, वेळास जैवविविधता वारसास्थळ

जिल्हाधिकारी देवेंदर सिंह; जैवविविधता राखण्यास मदत

रत्नागिरी, ता. २१ : महाराष्ट्र राज्य जैवविविधता मंडळ (नागपूर) यांच्या बैठकीमध्ये जिल्ह्यातील आंजर्ले (ता. दापोली) व वेळास, (ता. मंडणगड) येथील समुद्रकिनाऱ्याच्या ठिकाणी जैवविविधता वारसास्थळ घोषित करण्याचा निर्णय घेण्यात आला आहे. जिल्हाधिकारी सिंह यांनी ही माहिती दिली.
जिल्हाधिकाऱ्यांच्या दालनात जिल्हास्तरीय जैविक विविधता व्यवस्थापन समितीची बैठक जिल्हाधिकारी सिंह यांच्या अध्यक्षतेखाली झाली. यावेळी जिल्हाधिकारी सिंह म्हणाले, जैवविविधता ही पर्यावरणीय सुरक्षा व मानवी कल्याणाशी निगडित असल्याने या स्थळांची नोंद घेऊन त्या स्थळांना जैवविविधता वारसास्थळ म्हणून घोषित केल्यास जलदरीतीने जैवविविधतेचा होणारा ऱ्हास रोखण्यास मदत होणार आहे.
ऑलिव्ह रिडले कासवांच्या बाबतीत सर्वसामान्य लोकांमध्ये जागृती होऊन कासवांचे संवर्धन व संरक्षण होण्यास मदत होऊन पर्यटनाच्यादृष्टीने अनन्यसाधारण महत्त्व प्राप्त होईल. आंजर्ले व वेळास या ठिकाणी जैवविविधता वारसास्थळ घोषित करण्यासाठी आवश्यक प्रस्ताव प्राप्त झाल्यानंतर ना हरकत प्रमाणपत्र देण्याची कार्यवाही शीघ्र गतीने व समितीच्या मंजुरीने करण्यात येईल. बैठकीमध्ये जिल्ह्यातील आंजर्ले व वेळास येथील समुद्रकिनारे ऑलिव्ह रिडले कासवांकरिता प्रसिद्ध असून, त्यांचे संवर्धन करण्याचे महत्त्व दर्शवणारे सादरीकरण विभागीय वनाधिकारी रत्नागिरी (चिपळूण) यांनी केले.
-----------
कोट
वेळास ऑलिव्ह रिडले, दुर्मीळ वनस्पती आणि आजूबाजूचा परिसर हा विविधतेने नटलेला आहे. त्यामुळे हा किनारा जैवविविधता स्थळ झाल्यास आम्हा ग्रामस्थांना आनंदच आहे. त्यासाठी ग्रामस्थांच्यावतीने लागणारे सर्व सहकार्य करण्यात येईल.
- हेमंत सालदुरकर, वेळास, ग्रामस्थ