swt2916.jpg
88022
कळसुली : येथील नाईटिये देवी सांस्कृतिक मंडळाच्या वतीने कापडी पिशव्यांचे मोफत वाटप करण्यात आले.

कळसुली नाईटिये मंडळातर्फे
गावात प्लास्टिकमुक्त उपक्रम
सकाळ वृत्तसेवा
तळेरे, ता. २९ : कळसुली (ता. कणकवली) येथील नाईटिये देवी सांस्कृतिक मंडळाने यावर्षीपासून प्लास्टिक वापरावर संपूर्ण बंदी घालून प्लास्टिकमुक्त मंडळ होण्याचा अभिनव निर्णय घेतला आहे. मंडळातील प्रत्येक सदस्याला पर्यायी म्हणून कापडी पिशव्या मोफत वाटप केल्या आहेत.
गणेश चतुर्थीच्या दिवशी हा उपक्रम सुरू करण्यात आला. मंडळातील ३२ सदस्यांना प्रत्येकी दोन कापडी पिशव्या देण्यात आल्या. ज्येष्ठ सदस्यांनी या कल्पनेला पुढे नेले. त्यांचा ठाम आग्रह होता की, “आमच्या काळात प्लास्टिकचा वापर होत नव्हता. तो आरोग्य व पर्यावरणासाठी घातक ठरतो. त्यामुळे आपण मंडळापासूनच प्लास्टिकविरोधी चळवळ सुरू केली पाहिजे.”
यासाठी मंडळाने ठराव घेतला की, भजन, कीर्तन, चहा-पाणी अशा कोणत्याही कार्यक्रमात प्लास्टिकचे कप, पत्रावळ, चमचे किंवा ग्लास वापरणार नाहीत. त्याऐवजी स्टीलच्या भांड्यांचा वापर करण्याचा निर्धार करण्यात आला. प्लास्टिकमुक्त उपक्रमाचे लोकार्पण शशिकांत पारधिये, बाळा मेस्‍त्री, राजू सावंत, रमेश पारधिये, सुहास काणेकर, शंकर पारधिये, शांताराम पारधिये, मारुती ठाकूर यांच्या उपस्थितीत झाले. याप्रसंगी मंडळाचे सर्व सदस्य उपस्थित होते.
ग्रामपंचायत कळसुलीचे सरपंच सचिन पारधिये यांनी या उपक्रमाचे विशेष कौतुक केले. तसेच सरपंच सचिन पारधिये, दिलीप सावंत, हेमंतकुमार परब, संदीप पारधिये, संदीप ताम्हाणेकर, श्यामसुंदर आर्डेकर, सुनील पारधिये आदींनी या उपक्रमासाठी आर्थिक सहाय दिले. मंडळाचे अध्यक्ष वैभव पारधिये यांनी आभार मानले.