गणपतीपुळेत दुचाकींच्या
धडकेत तिघे जखमी
रत्नागिरी ः तालुक्यातील गणपतीपुळे येथील हॉटेलच्या वळणावर दोन दुचाकीमध्ये अपघात झाला. यामध्ये तिघेजण जखमी झाले तर एकजण किरकोळ जखमी झाला. त्यांना उपचारासाठी जिल्हा शासकीय रुग्णालयात दाखल केले होते. अधिक उपचारासाठी कोल्हापूर येथे हलविण्यात आले आहे. महादेव ज्योतिराम कांबळे (वय ३१) व प्रकाश लाला बनसोडे (वय २६, दोघेही रा. आवे, पंढरपूर जि. सातारा) आणि सहदेव लेट ही गंभीर जखमींची नावे आहेत. ही घटना बुधवारी (ता. २७) दुपारी गणपतीपुळे येथील अभिषेक हॉटेलच्या वळणावर घडली. पोलिसांकडून मिळालेल्या माहितीनुसार, जखमी महादेव कांबळे व प्रकाश बनसोडे हे दोघे दुचाकीवरून गणपतीपुळे येथील आरेवारेमार्गे रत्नागिरीत येत असताना हॉटेल येथील रस्त्याच्या वळणावर समोरून येथे सहदेव लेट व नूतन लेट यांच्या दुचाकीशी समोरासमोर धडक झाली. या अपघातामध्ये महादेव, प्रकाश आणि सहदेव हे गंभीर जखमी झाले. नूतन लेट या तरुणाला किरकोळ दुखापत झाली. जखमींना उपचारासाठी जिल्हा शासकीय रुग्णालयात दाखल करण्यात आले होते. अधिक उपचारासाठी त्यांना कोल्हापूरला हलविण्यात आले आहे.

विलेपार्लेतील प्रौढाचा
आकस्मिक मृत्यू
पावस ः वाहत्या पऱ्यामध्ये बेशुद्धावस्थेत सापडलेल्या प्रौढाला उपचारासाठी जिल्हा शासकीय रुग्णालयात दाखल केले होते. तेथील वैद्यकीय अधिकाऱ्यांनी त्यांना तपासून मृत घोषित केले. सतीश सखाराम पुजारी (वय ५१, रा. पोतदारवाडी, विलेपार्ले, मुंबई, सध्या रा. बेहेरेवाडी, मेर्वी, रत्नागिरी) असे मृत प्रौढाचे नाव आहे. ही घटना गुरूवारी (ता. २८) घडली. पोलिसांकडून मिळालेल्या माहितीनुसार, सतीश पुजारी हे रविवारी (ता. २४) गणपतीसाठी आले होते. त्यांच्या घरी दुपारी गणपतीची स्थापना झाल्यानंतर दुपारी साडेबाराच्या सुमारास ते न सांगता घरातून निघून गेले. बराच वेळ ते परत न आल्याने त्यांचा शोध घेतला असता ते अशोक बेहेरे यांच्या आंब्याच्या बागेजवळ काळीकोंड येथील पाण्याच्या वाहत्या पऱ्यामध्ये उपड्या स्थितीत आढळले. त्यांना रुग्णवाहिकेने पावस प्राथमिक आरोग्यकेंद्रात दाखल केले होते. तेथून जिल्हा शासकीय रुग्णालयात दाखल केले असता तेथील वैद्यकीय अधिकाऱ्यांनी त्यांना तपासून मृत घोषित केले. पूर्णगड सागरी सुरक्षा पोलिस ठाण्यात आकस्मिक मृत्यूची नोंद करण्यात आली आहे.