ग्राहक बनून आल्या, सोनं घेऊन पळाल्या!
खेडमधील प्रकार ; ज्वेलर्सच्या सीसीटीव्हीत चौघी कैद
सकाळ वृत्तसेवा
खेड, ता. २९ : शहरातील निवाचा तळभागात असलेल्या ज्वेलर्समध्ये धक्कादायक चोरीची प्रकार घडला. ग्राहकाच्या वेशात आलेल्या चार महिलांच्या टोळीने दागिने पाहण्याच्या बहाण्याने सोन्याचे मंगळसूत्र हातचलाखीने चोरून नेले. या संपूर्ण प्रकाराचा सीसीटीव्ही फूटेजमधून उलगडा झाला असून, पोलिस तपास सुरू आहे.
मिळालेल्या माहितीनुसार, चार महिलांची टोळी ग्राहक बनून दागिने पाहण्यासाठी दुकानात दाखल झाल्या. सोन्याचे मंगळसूत्र निवड करताना त्यातील एका महिलेने अंदाजे २.५ ते ३ ग्रॅम वजनाचे सोन्याचे मंगळसूत्र मणी (किंमत सुमारे २५ ते ३० हजार रुपये) हातात घेतले. क्षणातच तिने ते मंगळसूत्र हातात ठेवून सरळ दुकानाबाहेर पळ काढला. तिच्या पाठीमागे इतर तीन महिलांनीही पळ काढला. सीसीटीव्हीत कैद झालेला प्रकार अचानक घडलेल्या या घटनेने दुकानदार व कर्मचारी काही क्षण गोंधळले; मात्र सीसीटीव्ही फूटेजमध्ये हा संपूर्ण प्रकार स्पष्टपणे चित्रित झाला असून, त्यावरून पोलिस तपासाची चक्रे वेगाने फिरत आहेत.
दोन दिवसांपूर्वीच खेड रेल्वेस्थानक परिसरात, रिक्षात बसण्याच्या गडबडीत एका महिलेच्या गळ्यातील मंगळसूत्र व दागिन्यांची बॅग पळवून नेण्यात आली होती. या सलग घटनांमुळे महिलांची टोळीच या चोरीमागे सक्रिय असल्याचा पोलिसांचा संशय बळावला आहे. खेड पोलिस सीसीटीव्ही फूटेजच्या आधारे संशयितांचा शोध घेत आहेत.