रत्नागिरीची कृती आराखडा
सादरीकरणासाठी निवड
रत्नागिरी, ता. ३० ः राज्यातील सर्व जिल्हाधिकाऱ्यांकडून १५० दिवस कृती आराखड्याच्या अनुषंगाने केलेल्या कार्यवाहीबाबत सादरीकरण मागवण्यात आले होते. त्याचे गुणांकन करण्यात आले असून, तयार केलेल्या सादरीकरणात कोकण विभागात रत्नागिरी जिल्हाधिकारी कार्यालयाची निवड झाली आहे. पाच महसूल विभागातून प्रत्येकी एका जिल्ह्याची निवड केली आहे.
अधिकारी, कर्मचाऱ्यांच्या सेवाविषयक प्रगतीचे मूल्यांकन करण्याकरिता व पारदर्शक, गतिमान सुप्रशासनाची उद्दिष्टे साध्य करण्यासाठी ६ मे ते २ ऑक्टोबर या कालावधीत १५० दिवसांचा सेवाकर्मी कार्यक्रम प्रत्येक प्रशासकीय विभागांनी राबवण्याबाबत निर्देश दिले आहेत तसेच सर्व विभाग व क्षेत्रीय कार्यालयांनी ई-प्रशासनाच्यादृष्टीने सर्वंकष सुधारणा करून नागरिकांना अधिक सुलभरितीने सेवा पुरवण्यासाठी १५० दिवसांचा कृती आराखडा निश्चित केला आहे. ई-प्रशासन सुधारणांबाबत राज्यस्तरावर स्पर्धेचे आयोजन केले आहे. यासाठी राज्यातील ६ जिल्ह्यांची निवड झालेली आहे.