91636

‘तारका’ नृत्याविष्काराने रसिक मंत्रमुग्ध, सभागृह दुमदुमले

कुडाळातील कार्यक्रम; ‘चिमणी पाखरं’च्या विद्यार्थ्यांचे कौतुक

सकाळ वृत्तसेवा
कुडाळ, ता. १५ ः चिमणी पाखरं डान्स अॅकॅडमी, कुडाळतर्फे आयोजित ‘तारका’ या नृत्य कार्यक्रमाला रसिकांनी उत्स्फूर्त प्रतिसाद दिला. येथील मराठा समाज सभागृहामध्ये ‘तारका... नृत्याचा सुरेख प्रवास’ या कार्यक्रमाचे आयोजन केले होते.
यावेळी डॉ. योगेश नवांगुळ, अतुल बंगे, द्वारकानाथ घुर्ये, सचिन देसाई, नीलेश गुरव, उमेश पाटील, स्वाती पाटील, ‘चिमणी पाखरं’चे अध्यक्ष रवी कुडाळकर, सल्लागार सुनील भोगटे उपस्थित होते. कार्यक्रमाची सुरुवात नृत्यांगना दीक्षा नाईक आणि १४ सहकलाकारांच्या संचाने केली. नृत्याच्या माध्यमातून कलेची देवता नटराजाची महती सांगत, चित्रपटगीते, लावणी सादरीकरणाने रसिकांना खिळवून ठेवले. चौसष्ठ कलांचा स्वामी असलेला श्रीगणेश आणि नृत्याची देवता नटराज यांना वंदन करून तारकांनी कला सादर केली.
यावेळी भारतीय, पाश्चात्य नृत्याचे विविध प्रकार सादर झाले. सर्व कलाकारांनी ‘सैय्या’ गीतावर सादर केलेल्या नृत्याने अनेकांचे डोळे पाणावले. तारका शोमधील एकमेव पुरुष कलाकार निखिल कुडाळकर याने ‘लल्लाटी भंडार’ या गीतावर केलेल्या सादरीकरणाने सभागृहात उत्साह संचारला. यानंतर ‘जय जय महाराष्ट्र माझा’ या महाराष्ट्र गीतावरील नृत्याने सर्वांचा ऊर अभिमानाने भरून आला.
सिमरन नायर, दीक्षा नाईक, संजना पवार, साक्षी परब, दूर्वा परब, विशाखा धामापूरकर, तनिषा नाईक, सलोनी सावंत, अंतरा ठाकूर, प्राची जाधव, युक्ती हळदणकर, चिन्मयी सावंत, निधी केळुसकर, प्राची पाटकर आणि निखिल कुडाळकर या सिंधुदुर्गच्या स्थानिक कलाकारांनी आपल्या प्रतिभेने रसिकांना मंत्रमुग्ध केले. रवी कुडाळकर यांनी निवेदन केले. सुनील भोगटे यांची संकल्पना होती. सुजय जाधव, तन्मय आईर आणि श्री. राऊळ यांनी सहकार्य केले.