सिंधुदुर्गात आजपासून ‘सेवा पंधरवडा’

यंत्रणेकडून स्वतंत्र नियोजन; तीन टप्प्यांत रस्ते, घरांसह नाविन्यपूर्ण उपक्रम राबविणार

सकाळ वृत्तसेवा
ओरोस, ता. १६ ः पंतप्रधान नरेंद्र मोदी यांच्या वाढदिवसाचे औचित्य साधून उद्या (ता.१७) पासून प्रारंभ होणाऱ्या आणि राष्ट्रपिता महात्मा गांधी यांच्या जयंतीदिनी २ ऑक्टोबरला समारोप होणाऱ्या ‘सेवा पंधरवडा’ अभियानाच्या यशस्वितेसाठी जिल्ह्याच्या प्रत्येक यंत्रणेकडून स्वतंत्र नियोजन करण्यात आले आहे. तीन टप्प्यांत राबविण्यात येणाऱ्या सेवा पंधरवडा उपक्रमाच्या माध्यमातून रस्ते, घरे यांसह स्थानिक गरजा आणि भौगोलिक परिस्थिती लक्षात घेवून नावीन्यपूर्ण उपक्रम राबविण्यावर भर देण्यात आला आहे.
शासनातर्फे राबविण्यात येणाऱ्या सेवा पंधरवडा अभियानाचे तीन टप्पे केले आहेत. यातील पाहिला टप्पा १७ ते २२ सप्टेंबर या कालावधीत राबविण्यात येणार आहे. यामध्ये पाणंद, रस्ते विषयक मोहीम राबविली जाणार आहे. दुसरा टप्पा २३ ते २७ सप्टेंबर या कालावधीत राबविण्यात येणार असून सर्वासाठी घरे यासाठी पूरक उपक्रम राबवून प्रयत्न केले जाणार आहेत. तर तिसरा टप्पा २८ सप्टेंबर ते २ ऑक्टोबर या कालावधीत राहणार आहे. यावेळी जिल्हाधिकाऱ्यांमार्फत स्थानिक परिस्थितीनुसार नावीन्यपूर्ण उपक्रम राबविले जाणार आहेत.
पहिल्या टप्प्यात राबविण्यात येणाऱ्या पाणंद रस्ते मोहिमेमध्ये शेतकऱ्यांच्या शेतांपर्यत रस्ता उपलब्ध करण्यासाठी शेत रस्त्यांची मागणी पूर्ण करणारी समग्र योजना राबविली जाणार आहे. तसेच विविध योजनांच्या निधीचा समन्वय साधून शेतरस्त्यांच्या निर्मितीसाठी प्रयत्न केले जाणार आहेत. यासाठी उपविभागीय अधिकाऱ्यांपर्यंत अपील करण्याची व्यवस्था केली आहे. याशिवाय वाटपपत्रात शेतकऱ्यांचा समावेश करण्यात येणार असून शेतरस्त्यांच्या अडचणी सोडवण्यासाठी लोक अदालत आयोजित केली जाणार आहे. रस्त्यांचे सपाटीकरण व चालू वहिवाट रस्त्यांचे सर्वेक्षण केले जाणार आहे. गाव नकाशात शेतरस्त्यांचा समावेश करण्याची कार्यवाही केली जाणार आहे. शेतरस्ता किमान ३-४ मीटर रुंदीचा जमाबंदी आयुक्तांच्या माध्यमातून क्रमांकित केला जाणार आहे. सातबारा उताऱ्याच्या इतर हक्कांमध्ये शेतरस्त्याची नोंद करून कायदेशीर वैधता सुनिश्चित केली जाणार आहे. ग्रामीण रस्त्यांच्या सीमांकनाबाबत शासन निर्णयाची अंमलबजावणी केली जाणार असून शिव पाणंद रस्त्यांचे सर्वेक्षण केले जाणार आहे. शासन दप्तरी नोंद न झालेल्या रस्त्यांची नोंद घेतली जाणार आहे. शेत रस्त्यांसाठी संमतीपत्र घेतले जाणार आहे. रस्ता अदालत आयोजित करून प्रलंबित प्रकरणे निकाली काढली जाणार आहेत. शेतरस्त्यांची मोजणी व सीमांकन केले जाणार आहे.
दुसऱ्या टप्प्यात राबविण्यात येणाऱ्या सर्वासाठी घरे या मोहिमेत प्रत्येक नागरिकाला परवडणारे व सुरक्षित घर मिळावे, यासाठी शासकीय जमिनीचा कब्जा अधिकाराने वाटप केले जाणार आहे. अस्तित्वातील शासकीय जमिनीवरील अतिक्रमणे नियमानुसार सुधारित केली जाणार आहेत. महसूल विभागाच्या शासन निर्णयानुसार आरक्षण विकास आराखड्याशी सुसंगत असल्यास गायरान नोंदी कमी करून अतिक्रमणे नियमानुसार सुधारित केली जाणार आहेत. आराखड्‌याशी सुसंगत नसल्यास आरक्षण बदलाचा प्रस्ताव तयार केला जाणार आहे. शासकीय जमिनी वाटप किंवा अतिक्रमण नियमानुसार केलेल्या लाभार्थ्यांना जमिनीचे पट्टे वितरण केले जाणार आहेत.
तिसऱ्या आणि शेवटच्या टप्प्यात नावीन्यपूर्ण उपक्रम राबविले जाणार आहेत. स्थानिक गरजा आणि भौगोलिक परिस्थितीचा विचार करून जिल्हाधिकाऱ्यांमार्फत हे नावीन्यपूर्ण उपक्रम राबविण्यात येणार आहेत. यात स्थानिक ते संसदीय पातळीपर्यंत लोकप्रतिनिधीना सहभागी करून घेतले जाणार आहे. सर्वसामान्य नागरिकांना अभियानाबाबत माहिती पोहोचविण्यासाठी स्थानिक आणि राज्यस्तरीय प्रसार, प्रचार केला जाणार आहे.
-------------
अधिकारी घेणार आढावा
अभियानाचे नियोजन आणि नियमित आढावा घेतला जाणार आहेत. अपर मुख्य सचिव, विभागीय आयुक्त, जिल्हाधिकारी, उपविभागीय अधिकारी, तहसीलदार यांच्याद्वारे हा आढावा घेतला जाणार असून यात जमाबंदी आयुक्त व नोंदणी महानिरीक्षक यांचाही सहभाग असणार आहे.
--------------
कोट
91981
छत्रपती शिवाजी महाराज महाराजस्व अभियानांतर्गत १७ सप्टेंबर ते २ ऑक्टोबर २०२५ या कालावधीत ‘सेवा पंधरवडा’ उत्साहात साजरा करण्यात येणार आहे. या पंधरवड्यात पाणंद रस्ते, सर्वांसाठी घरे आणि नावीन्यपूर्ण उपक्रम याचे काटेकोर नियोजन करावे. या उपक्रमाच्या यशस्वी आयोजनासाठी संबंधित विभागांनी प्रयत्न करावेत. गाव नकाशावर नोंद असलेले तसेच नोंद नसलेले पण वापरात असलेले रस्ते व क्षेत्र शोधून त्यांचे सर्वेक्षण करून सीमांकन करणे आवश्यक आहे. या कामासाठी महसूल यंत्रणेने काटेकोरपणे लक्ष द्यावे.
- तृप्ती धोडमिसे, जिल्हाधिकारी