बोरघर, चिंचघरला रात्रीत
दोन अजगरांना जीवदान
खेड, ता. १७ : तालुक्यातील बोरघर-मोहल्ला व चिंचघर-प्रभूवाडी या दोन वेगवेगळ्या ठिकाणी एकाच रात्री दोन अजस्त्र अजगर दिसले. नागरिकांनी दाखवलेल्या जागरूकतेमुळे व वन विभागासह छत्रपती वाईल्डलाईफ फाउंडेशनच्या सदस्यांच्या तत्परतेमुळे दोन्ही अजगरांना पकडून नैसर्गिक अधिवासात सोडण्यात आले.
बोरघर येथे १५ सप्टेंबरला रात्री सुमारे आठच्या सुमारास तब्बल नऊ फूट लांबीचा अजगर आढळला. स्थानिकांनी तातडीने वन विभागाशी संपर्क साधला. पथकाने सावधगिरी बाळगून अजगराला सुरक्षितरित्या ताब्यात घेतले. याच घटनेनंतर अवघ्या काही तासांत मध्यरात्री चिंचघर-प्रभूवाडी येथे दहा फूट लांबीचा अजगर दिसला. पुन्हा एकदा वनविभागाचे पथक व रेस्क्यू टीम घटनास्थळी दाखल झाली आणि अजगराला सुरक्षितरीत्या पकडले. दोन्ही अजगरांची वैद्यकीय तपासणी करून त्यांना पुन्हा नैसर्गिक अधिवासात सोडले. मोहिमेत छत्रपती वाईल्डलाईफ फाउंडेशनचे सर्वेश पवार, श्वेत चोगले, रोहन खेडेकर, सूरज जाधव व सुमित म्हाप्रळकर यांनी सक्रिय सहभाग घेतला. त्यांना वन विभागाचे अधिकारी वनपाल उदय भागवत, वनरक्षक परमेश्वर डोईफोडे व अशोक ढाकणे यांनी सहकार्य केले.