शारदादेवीचा उद्यापासून नवरात्रोत्सव
तुरंबवमध्ये विविध कार्यक्रम; भाविकांसाठी एसटी
सकाळ वृत्तसेवा
चिपळूण, ता. २० : तालुक्यातील तुरंबव हे श्री शारदादेवीचे तीर्थक्षेत्र यंदा नवरात्रात पुन्हा भक्तांनी गजबजणार आहे. सोमवारी (ता. २२) नवरात्रोत्सवाची धामधूम सुरू होत आहे. या निमित्त विविध कार्यक्रमांचे आयोजन करण्यात आले आहे.
सावर्डेपासून १२ किलोमीटर अंतरावर आणि निवळीपासून सुमारे ४ किमीवरील निसर्गरम्य तुरंबव देवस्थान दाट हिरवाईने वेढलेले आहे. नवरात्रातील पहिल्या माळेनंतर येथे शारदोत्सवाची सुरुवात होते. राज्यभरातून भाविक दर्शनासाठी येतात. २२ सप्टेंबर रोजी रूप्यांच्या मूर्तीची प्रतिष्ठापना, सायंकाळी ६ ते रात्री ११ पर्यंत दर्शन, रात्री ९ वाजता महाआरती, १०.३० ते ११.३० पारंपरिक जाखडी नृत्य त्यानंतर नवस फेडण्याच्या कार्यक्रमाला सुरुवात होईल. २३ सप्टेंबर ते १ ऑक्टोबर या कालावधीत दररोज सकाळी ८ ते रात्री ११ देवीचे दर्शन, रात्री ९ वाजता महाआरती, १०.३० वाजता जाखडी नृत्य असे कार्यक्रम होतील. रात्री ११.३० नंतर गाभाऱ्यात प्रवेश बंद असला तरीही मुखदर्शनाची सोय ठेवण्यात आली आहे.
भाविकांच्या सोयीसाठी एसटी महामंडळाने चिपळूण-तुरंबव आणि सावर्डे-तुरंबव या मार्गांवर विशेष बसफेऱ्या ठेवल्या आहेत. कोकण रेल्वेने येणाऱ्यांनी सावर्डे स्थानकावर उतरावे, गाडीचा थांबा नसेल तर चिपळूण येथे उतरून रस्त्याने यावे.