अपघातास कारणीभूत,
चालकाला कारावास
रत्नागिरीः रत्नागिरी- पावस मार्गवरील गोळप धार येथे अपघातास कारणीभूत ठरलेल्या ट्रक चालकाला न्यायालयाने २ हजार रुपये दंड आणि दंड न भरल्यास सहा दिवसांची साध्या कारावासाची शिक्षा ठोठावली. सय्यद अन्सार पाशा (वय ५०, रा. चित्रदुर्ग कर्नाटक) असे आरोपीचे नाव आहे. रत्नागिरी प्रथम वर्ग न्यायदंडाधिकारी के. आर. पाटील यांनी या खटल्याचा निकाल दिला. खटल्यातील माहितीनुसार सय्यद पाशा हा २१ ऑगस्टला ट्रक (केए-१६-एए-१४११) घेवून रत्नागिरी पावस रस्त्याने जात होता. रात्री दहा वाजण्याच्या सुमारास पाशा हा गोळपधार येथे आला असता त्याचा ट्रकवरील ताबा सुटला आणि ट्रक रस्त्याकडेच्या आंब्याच्या झाडाला धडकला. या अपघातात पाशा याला दुखापत झाली होती. तसेच ट्रकचेही नुकसान झाले होते. या प्रकरणी पूर्णगड पोलिसांनी पाशा यांच्याविरुद्ध गुन्हा दाखल करुन दोषारोपपत्र न्यायालयात दाखल केले होते.