जिल्हा क्रीडा पंच महासंघाची
शनिवारी ओरोस येथे बैठक

मालवण, ता. १ : सिंधुदुर्ग जिल्ह्यातील सर्व खेळांमधील पंचांना एका छत्राखाली आणण्यासाठी आणि त्यांच्यासाठी एक नियमावली तयार करण्यासाठी सिंधुदुर्ग जिल्हा क्रीडा पंच महासंघाने महत्त्वाचे पाऊल उचलले आहे. अध्यक्ष अजय शिंदे यांच्या नेतृत्वात शनिवारी (ता. ४) सायंकाळी ५ वाजता सिंधुदुर्ग जिल्हा माध्यमिक, उच्च माध्यमिक शिक्षक-शिक्षकेतर कर्मचारी पतसंस्था, ओरोस येथील सभागृहात बैठक आयोजित केली आहे.
या बैठकीचा मुख्य उद्देश शासनमान्य अनुदानित, विनाअनुदानित ९४ खेळांमधील पंचांना एकत्रित करणे, जिल्ह्यात क्रीडा चळवळ अधिक बळकट करणे, हा आहे. जिल्ह्यातील क्रीडा शिक्षक संघटना, क्रीडा शिक्षक पंच, असोसिएशन पंच, हौशी खेळाडू पंच या सर्वांना एकत्रित करून मैदानावर येणाऱ्या प्रत्यक्ष समस्या जाणून घेतल्या जाणार आहेत. पंच महासंघातील पंचांची सभासद म्हणून नोंदणी, ओळखपत्र आणि ड्रेस कोड निश्चित करणे, स्पर्धेच्या ठिकाणी खेळाडूंना मिळणाऱ्या अपुऱ्या सुविधा यावर चर्चा करण्यात येणार आहे. जिल्ह्यातील कार्यरत क्रीडा शिक्षक संघटना, क्रीडा शिक्षक पंच, असोसिएशन पंच, हौशी खेळाडू पंच आणि विविध क्रीडा संघटनांचे पदाधिकारी व पंच या सर्वांनी या सभेस उपस्थित राहण्याचे आवाहन शिंदे यांनी केले आहे.