नाटेत मद्य विक्री करणाऱ्या
दोघांसह रिक्षा ताब्यात
राजापूर, ता. १ : नवरात्रोत्सवाच्या पार्श्वभूमीवर रात्री गस्त घालत असताना नाटे पोलिसांनी नाटे-जैतापूर मार्गावर विनापरवाना मद्य वाहतूक व विक्री करणाऱ्याविरोधात धडक कारवाई केली. यामध्ये नाटे पोलिसांनी एका रिक्षासह देशी-विदेशी दारू असा एकूण दोन लाख १० हजार ६४० रुपयांचा मुद्देमाल जप्त केला. याप्रकरणी संशयित गणेश रमेश सुर्वे (रा. तुळसुंदे) आणि नीलेश प्रभाकर आडीवरेकर (रा. मिठगावणे) यांच्या विरोधात गुन्हा दाखल केला आहे.
नाटे पोलिस ठाणे हद्दीत पेट्रोलिंग करत असताना ऑटो रिक्षाद्वारे अवैधपणे दारू विक्री होत असल्याची माहिती नाटे पोलिसांना मिळाली. त्यानुसार घटनास्थळी पोहोचून पोलिसांकडून रिक्षाची तपासणी केली. त्यावेळी त्यांना विनापरवाना मद्यवाहतूक व विक्री करत असल्याचे निदर्शनास आले. त्यानुसार कारवाई करताना मुद्देमालासह संशयितांना ताब्यात घेण्यात आल्याची माहिती नाटे पोलिसांनी दिली.