विज बिल वितरण करणाऱ्या
कर्मचाऱ्यांचे आंदोलन
लांजा, ता. १ ः महावितरणकडे मीटर रीडिंग, बिल प्रिंटींग व वितरणाचे काम करणाऱ्या कर्मचाऱ्यांनी विविध मागण्यांसाठी आंदोलनाचा इशारा दिला होता. राज्यभरातील एजन्सींचे कर्मचाऱ्यांच्या मागण्यांकडे दुर्लक्ष होत आहे. यामुळे महावितरणविरोधात आंदोलन करण्याबाबत राज्याच्या मुख्य महाव्यस्थापकांना निवेदन दिले होते. मागण्या मान्य न झाल्याने एक ऑक्टोबरपासून कर्मचाऱ्यांनी काम बंद आंदोलन सुरु केले आहे.
अनेक वर्षांपासून त्यांनी सातत्याने व नियमबद्ध पद्धतीने महावितरणचे रीडिंग व बिल वितरणाचे काम प्रामाणिकपणे केले आहे. मात्र, राज्यभरात स्मार्ट मीटर बसवण्यात येत असल्याने पारंपरिक रीडिंगचे काम मोठ्या प्रमाणात कमी झाले आहे.
स्मार्ट मीटर बसवणाऱ्या यंत्रणा अनेक ठिकाणी अर्धवट काम करून निघून जात आहेत. अशा परिस्थितीत रीडिंग नोंदणी करणाऱ्यांसमोर ग्राहक शोधणे आणि रीडिंग घेणे ही मोठी समस्या झाली आहे.