जैवविविधतेवर आज, उद्या प्रदर्शन
सकाळ वृत्तसेवा
चिपळूण, ता. ४ ः राष्ट्रीय वन्यजीव सप्ताहाच्या निमित्ताने ‘रत्नागिरीची जैवविविधता’ या छायाचित्र प्रदर्शनाचे आयोजन ५ व ६ ऑक्टोबरला सकाळी ११ ते ६ दरम्यान मार्कंडी येथील वनभवन येथे आयोजित केले आहे. यातून जिल्ह्यातील विविध आणि दुर्मिळ जैवविविधतेचे, स्थानिक नैसर्गिक वारशाचे छायाचित्रांद्वारे सादरीकरण करून विद्यार्थ्यांमध्ये व नागरिकांमध्ये पर्यावरणाची जाणीव निर्माण केली जाणार आहे.
प्रदर्शनामध्ये कातळसडे, रानभाज्या, दुर्मिळ प्रजातींची छायाचित्रे आणि परिसंस्थांची वैशिष्ट्ये यांचे दर्शन होईल. ‘चला सडे जाणून घेऊया’ आणि ‘रत्नागिरीतील रानभाज्या’ या विशेष छायाचित्र दालनांच्या माध्यमातून अनोख्या जैवविविधतेची माहिती मिळणार आहे. चिपळूण येथील नयनिश गुढेकर, नितीन नार्वेकर, चंद्रकांत भागवत अशा अनेक स्थानिक वन्यजीव छायाचित्रकारांचे फोटो, तज्ज्ञांचे मार्गदर्शन, अनुभवांची देवाणघेवाण, प्रश्नोत्तरांचे सत्र असे बहुविध कार्यक्रम या प्रदर्शनाचा भाग आहेत. प्रदर्शन सर्व वयोगटांसाठी खुले असून, प्रवेश विनामूल्य आहे व नोंदणी आवश्यक नाही.