96451

ज्येष्ठांप्रती नेहमी आदरभाव जपा

शुभांगी साठे ः सिंधुदुर्गनगरीत गुणवंत विद्यार्थ्यांचा गौरव

सकाळ वृत्तसेवा
सिंधुदुर्गनगरी, ता. ४ ः अलीकडील काळात ज्येष्ठांकडे दुर्लक्ष केले जाते. मात्र, सिंधुदुर्गनगरीतील नवनगर प्राधिकरण रहिवाशी संघाने ज्येष्ठांचा सत्कार करून आदरभाव व्यक्त केला, हे कौतुकास्पद आहे. येथील रहिवाशांना चांगल्या सुविधा देण्यासाठी निश्चितपणे प्रयत्न करू, असे प्रतिपादन अप्पर जिल्हाधिकारी शुभांगी साठे यांनी सिंधुदुर्गनगरी येथे आयोजित कार्यक्रमात केले.
सिंधुदुर्गनगरी नवनगर प्राधिकरण रहिवासी संघामार्फत प्राधिकरण क्षेत्रातील दहावी, बारावी, पदवी प्राप्त गुणवंत विद्यार्थी तसेच विविध क्रीडा, कला क्षेत्रात प्रावीण्य प्राप्त विद्यार्थी आणि ज्येष्ठ व्यक्तींचा सत्कार समारंभ नवरात्रोत्सवाच्या निमित्ताने झाला. यावेळी श्रीमती साठे बोलत होत्या. व्यासपीठावर महसूल विभाग तहसीलदार चैताली सावंत, प्राधिकरणचे अधिकारी श्री. येडके, नवनगर रहिवासी संघाचे अध्यक्ष आदेश नाईक, उपाध्यक्ष उल्हास पालव, अशोक रासम, चंद्रकांत पाटकर, दाजी वारंग, संतोष बांदेकर, संदीप गावडे, वनिता जुवेकर, दीप्ती धालवलकर, राजश्री नाईक आदी उपस्थित होते.
श्रीमती साठे यांनी, नवनगर राहिवाशी संघाने मुलांच्या कलागुणांना संधी दिली. ज्येष्ठांप्रती आदरभाव व्यक्त केला. येथील समस्या सोडविण्यासाठी संघाचे सुरू असलेले प्रयत्न स्तुत्य आहेत, असे सांगितले. प्राधिकरणमधे राहत असल्याने येथील समस्या आम्हाला माहिती आहेत. प्राधिकरणची लवकरच बैठक घेऊन या समस्या जिल्हाधिकाऱ्यांमार्फत सोडविण्यासाठी प्रयत्न करू, अशी ग्वाही चैताली सावंत यांनी दिली. अध्यक्ष आदेश नाईक यांनी प्रास्ताविक केले. सौ. राजाध्यक्षा यांनी सूत्रसंचालन केले. अशोक रासम यांनी आभार मानले.