96461

केर परिसरामध्ये वाघाचा
संचार; ग्रामस्थ भयभीत

सकाळ वृत्तसेवा
दोडामार्ग, ता. ४ : केर येथे भर दिवसा पट्टेरी वाघाचा मुक्त संचार पाहायला मिळाला. येथील ओंकार देसाई हे सायंकाळी घरी जात असताना रस्त्यावर त्यांना वाघ दृष्टीस पडला. सायंकाळीच एका गायीची शिकार वाघाने केली होती. त्यामुळे भीती वाढली आहे. बिबट्या की पट्टेरी वाघ, हे नेमके समजत नसले तरी ग्रामस्थांत मात्र भीती आहे.
याबाबत मिळालेली माहिती अशी की, शुक्रवारी (ता. ३) सायंकाळी केर येथील मंगेश देसाई यांची गाय वाघाने ठार केली होती. यातच रात्री आठ वाजण्याच्या सुमारास ओंकार देसाई हे मोटारीने गावी येत असताना त्यांना समोर वाघ दिसला. या रस्त्यावरून दुचाकीस्वारांची रात्री उशिरापर्यंत ये-जा असते. त्यामुळे ग्रामस्थांत भीती आहे. वनविभागाच्या अधिकाऱ्यांना याबाबत ग्रामपंचायत पदाधिकाऱ्यांनी कल्पना दिली. त्यांनी कर्मचारी पाठवण्याची ग्वाही दिली.
केर येथे भर दिवसा वाघाचा संचार पाहता हा वाघ मूळ अधिवासातील आहे की वनविभागाने सोडला?, याबाबत ग्रामस्थांत संभ्रम आहे. कारण वाघ कमालीचा आक्रमक दिसतो. त्यात मुख्य रस्त्यावर बसलेला पाहुन सध्या ग्रामस्थांत प्रचंड भीती आहे. वनविभागाने तातडीने गावात येऊन वातावरण भयमुक्त करावे, अशी मागणी ग्रामस्थ करीत आहेत.