97703

रस्त्याची दुरूस्ती न झाल्‍यास तीव्र आंदोलन

फोंडाघाटप्रश्‍नी राष्‍ट्रवादीचा इशारा; बांधकाम अभियंत्‍यांना निवेदन

सकाळ वृत्तसेवा
कणकवली, ता. १० : देवगड-निपाणी महामार्गावरील फोंडाघाट येथील रस्त्याची बिकट अवस्था झाली आहे. या रस्त्याची तातडीने दुरूस्ती न झाल्‍यास तीव्र आंदोलन छेडू, असा इशारा राष्‍ट्रवादी शरदचंद्र पवार पक्षातर्फे देण्यात आला.
तालुकाध्यक्ष अनंत पिळणकर यांच्यासह जिल्हा चिटणीस रुपेश जाधव, कणकवली तालुका उपाध्यक्ष, महेश चव्हाण, उत्तम तेली, संतोष चव्हाण, तेजस पिळणकर, सुजल शेलार आदींनी सार्वजनिक बांधकामचे कार्यकारी अभियंता दिनेशकुमार बागुल यांची भेट घेतली. यावेळी त्‍यांनी फोंडाघाट रस्त्याच्या दुरवस्थेकडे लक्ष वेधले. तसेच दुरूस्तीची कार्यवाही न झाल्‍यास आंदोलनाचा इशारा दिला.
श्री.बागूल यांना दिलेल्‍या निवेदनात म्‍हटले आहे की, सिंधुदुर्ग जिल्ह्यातील फोंडा घाट रस्त्याची स्थिती दिवसेंदिवस अधिकच गंभीर बनली आहे. मुख्य फोंडा घाट मार्गाची अक्षरशः चाळण झाली असून, या मार्गावर चिखलाचे साम्राज्य आहे. त्यामुळे या मार्गाने प्रवास करणाऱ्या नागरिकांना प्रचंड गैरसोय सहन करावी लागत आहे. देवगड - निपाणी राज्य महामार्गावरील रस्त्याच्या क्राँक्रिटीकरणाचे काम सध्या सुरू आहे. ज्‍या कंपनीला हा ठेका देण्यात आला, त्‍या कंपनीकडून निकृष्‍ट दर्जाचे काम केले जात आहे. रस्त्याचे काम सुरू असताना घाट मार्गावर कोणत्याही प्रकारची सुरक्षा व्यवस्था न ठेवता निष्काळजीपणे काम सुरू आहे. त्यामुळे प्रवाशांच्या सुरक्षेला धोका निर्माण झाला आहे.
अलीकडेच ओरोस येथे एका शासकीय महिला अधिकाऱ्याचा खड्ड्यामुळे झालेल्या अपघातात मृत्यू झाला होता. तरीही सार्वजनिक बांधकाम विभागाला या प्रकारातून कोणताही धडा मिळालेला दिसत नाही. रस्त्यांवरील खड्ड्यांमुळे नागरिकांचे जीव धोक्यात आले असून, प्रशासन मात्र हातावर हात धरून बसले आहे. या पार्श्वभूमीवर राष्ट्रवादी काँग्रेसचे अनंत पिळणकर म्‍हणाले की, ‘‘फोंडा घाट रस्त्याची दुरवस्था दूर करण्यासाठी व निकृष्ट काम करणाऱ्या कंत्राटदारावर तत्काळ कारवाई करावी. अन्यथा आम्ही घाट रस्ता रोखून तीव्र आंदोलन छेडू,’’