जनसेवा ग्रंथालयातर्फे १४ रोजी
शब्दांकुर प्रकाशन, वाचक पुरस्कार
रत्नागिरी, ता. १२ : लक्ष्मी चौक येथील जनसेवा ग्रंथालयाच्या हस्तलिखित ‘शब्दांकुर’चा प्रकाशन सोहळा व जनसेवा ग्रंथालयातर्फे देण्यात येणारा ‘उत्कृष्ट वाचक पुरस्कार’ प्रदान सोहळा मंगळवारी (ता. १४) होणार आहे. जनसेवा ग्रंथालयातर्फे दरवर्षी दीपोत्सवाच्या पार्श्वभूमीवर शब्दांकुर हे हस्तलिखित प्रकाशित करत असते. या हस्तलिखित उपक्रमातून नवोदित साहित्यिकांना लेखनासाठी संधी देण्यात येते, तसेच प्राचीन लेखन परंपरेची जपणूक होते. गेली २५ वर्षे जनसेवा ग्रंथालय शब्दांकुर हे हस्तलिखित साकारत आले आहे. यावर्षीच्या हस्तलिखिताचे प्रकाशन १४ ला रोजी सायंकाळी ४ वाजता गोगटे- जोगळेकर महाविद्यालयाचे माजी प्राचार्य डॉ. किशोर सुखटणकर यांच्या हस्ते होणार आहे.
याच कार्यक्रमात जनसेवा ग्रंथालयातर्फे दरवर्षी देण्यात येणाऱ्या उत्कृष्ट वाचक पुरस्काराचे वितरणही करण्यात येणार आहे. यावर्षीचे उत्कृष्ट वाचक पुरस्कार बालगटातून शारदा अभ्यंकर व स्पृहा भावे यांना जाहीर झाले आहे. मोठ्या गटातून श्रीया पटवर्धन, नरेश पाडळकर यांना सन्मानित करण्यात येणार आहे. या कार्यक्रमाला वाचक, सभासद, साहित्यप्रेमींनी आवर्जून उपस्थित राहावे, असे आवाहन जनसेवा ग्रंथालयातर्फे केले आहे.