‘निवडणूक आरक्षणाबाबत
हरकती, सूचना सादर करा’

सकाळ वृत्तसेवा
सिंधुदुर्गनगरी, ता. १४ ः जिल्हा परिषद व पंचायत समिती अधिनियमान्वये सिंधुदुर्ग जिल्हा परिषद व त्याअंतर्गत पंचायत समितीच्या आगामी सार्वत्रिक निवडणुकीसाठी त्या जिल्हा परिषद क्षेत्रातील निवडणूक विभागाची व पंचायत समित्यांमधील निर्वाचक गणातील एकूण सदस्य संख्या, अनुसूचित जाती, अनुसूचित जमाती, नागरिकांचा मागासवर्ग प्रवर्ग तसेच स्त्रियांकरिता (अनुसूचित जाती, अनुसूचित जमाती, नागरिकांचा मागासवर्ग प्रवर्ग, सर्वसाधारण स्त्रियांसह) राखून ठेवण्यात आलेले निवडणूक विभाग व निर्वाचक गणाबाबत जिल्हाधिकारी यांच्या १३ ऑक्टोबरच्या प्रारुप आरक्षणाची अधिसूचनेची प्रत प्रसिद्ध करण्यात आली आहे, अशी माहिती सामान्य प्रशासन विभागाचे प्र. उपजिल्हाधिकारी आरती देसाई यांनी दिली. या आरक्षणाची माहिती पाहण्यासाठी जिल्हाधिकारी कार्यालय, जिल्हा परिषद तसेच सर्व तालुक्यांतील तहसीलदार कार्यालय तसेच सर्व पंचयात समिती कार्यालयांतील फलकावर प्रसिद्ध केली आहे. आदेशाच्या मसुद्यास कुणाची हरकत किंवा सूचना असल्यास त्यासंबंधीची सकारण लेखी निवेदने, हरकती, सूचना तहसीलदार व जिल्हाधिकारी यांच्याकडे १७ ऑक्टोबरपर्यंत सादर करावेत, असे प्रसिद्धी पत्रकात म्हटले आहे.