वेरळ येथे शुक्रवारपासून
लक्ष्मीकांताचा वार्षिकोत्सव
सकाळ वृत्तसेवा
रत्नागिरी, ता. १० : श्री लक्ष्मीकांताचा प्रतिवार्षिक उत्सव १४ ते २० नोव्हेंबर या कालावधीत वेरळ (ता. लांजा) येथील श्रीक्षेत्र लक्ष्मी केशव मंदिर येथे साजरा होणार आहे.
यावर्षी उत्सवाचे व्यवस्थापन अरुण देव, सुभाष देव (पुणे), अरविंद देव रतलाम् व देव कुटुंबातील इतर मंडळी करणार आहेत. उत्सवात दररोज रात्री ८.३० वाजल्यापासून आरत्या, भोवत्या, मंत्रपुष्पांजली, कीर्तन, दीपोत्सव पुरस्कार वितरण कार्यक्रम होणार आहेत.
उत्सवात कीर्तनसेवा दत्तात्रय उपाध्ये (कुडाळ) करणार आहेत. त्यांना संवादिनीसाथ योगेश सरपोतदार व तबलासाथ प्रसाद पटवर्धन करणार आहेत. १६ व १७ नोव्हेंबर व १९ व २० रोजी दुपारी १ वा. सर्व भक्तांना महाप्रसाद दिला जाणार आहे. १९ रोजी सायंकाळी दीपोत्सव साजरा होईल. २० ला ज्येष्ठ नागरिकांचा, गुणवंत विद्यार्थ्यांचा सत्कार करण्यात येणार आहे. उत्सवात बाहेरगावाहून येणाऱ्यांनी निवास व भोजनव्यवस्थेसाठी अंजली गुणे किंवा सुरेश गुणे यांच्याशी संपर्क साधावा. तसेच उत्सवासाठी देणगी लक्ष्मीकेशव संस्था, वेरळ या नावाने धनादेशाद्वारे पाठवावी, असे आवाहन केले आहे.