rat10p21.jpg-

दापोली ः मुरूड येथील शेतकरी संजय बाळ यांच्या भातपिकाची पाहणी करताना कृषी अधिकारी दादासाहेब पवार.
---------------
भातासह नारळ, सुपारी,
भाजीपाल्यालाही फटका
दापोली तालुका; शेतकऱ्याचे अर्थकारण विस्कटले
दापोली, ता. १० ः दिवाळीपासून झालेल्या पावसाने दापोली तालुक्यातील शेतकऱ्यांचे लाखो रुपयांचे नुकसान झाले. हंगामाच्या शेवटच्या टप्प्यात भात आणि नाचणीसह नारळ, सुपारी व भाजीपाला पिकांना मोठा फटका बसला आहे. तब्बल २ हजार २८९ शेतकऱ्यांचे अंदाजे ४१९ हेक्टर क्षेत्र बाधित झाल्याची माहिती कृषी विभागाकडून देण्यात आली.
चालू हंगामात भातशेतीचे क्षेत्र मोठ्या प्रमाणावर असल्याने भातपिकाचे सर्वाधिक ३८३ हेक्टर नुकसान झाले आहे याशिवाय नाचणीचे २५ हेक्टर, नारळ-सुपारीचे ८ हेक्टर, भाजीपाला व इतर पिकांचे दीड हेक्टर क्षेत्राला पावसाचा फटका बसला. या नुकसानीमुळे ग्रामीण अर्थचक्रावर थेट परिणाम झाला असून, शेतकऱ्यांची आर्थिक गणिते विस्कळीत झाली आहेत.
कृषी अधिकारी हेमंत ठोंबरे यांच्या मार्गदर्शनाखाली कृषी विभागाने तातडीने पंचनामे सुरू केले आहेत. अनेक शेतकऱ्यांनी नुकसान भरपाईसाठी अर्ज दाखल केले असून, अजूनही शेतकरी कृषी कार्यालयात नोंदणीसाठी येत आहेत. त्यामुळे अंतिम आकडेवारी वाढण्याची शक्यता आहे. पंचनाम्याची प्रक्रिया पूर्ण झाल्यानंतर शासनाने त्वरित मदत मंजूर करून सहाय्य वितरित करावे, अशी ठाम मागणी नुकसानग्रस्त शेतकऱ्यांकडून होत आहे.