भांबेड गटात दोन जागांवरून महायुतीत वाद
भाजपला देण्यास नकार ; विभागप्रमुख गुरव आक्रमक
सकाळ वृत्तसेवा
लांजा, ता. १७ ः भांबेड जिल्हा परिषद गट व पंचायत समिती गण या दोन्ही जागा महायुतीकडून शिवसेना शिंदेगटाला सोडाव्यात अन्यथा वेळ पडल्यास या दोन्ही जागा मिळवण्यासाठी रस्त्यावर उतरू, असा स्पष्ट इशारा भांबेड विभागप्रमुख प्रमोद (बाबू) गुरव यांनी दिला आहे. दोन्ही जागांपैकी एक जागा भाजपला दिली जाणार, अशी चर्चा होत असल्याने शिवसेना विभागप्रमुखांनी आक्रमक भूमिका घेतली आहे.
लांजा नगरपंचायत निवडणुकीत महायुती तुटणार, असे वाटत असताना महायुती कायम राहिली आहे. दोन्ही पक्ष महायुती म्हणून लांजा नगरपंचायत निवडणुकीला सामोरे जात आहेत. त्यामुळे येऊ घातलेल्या जिल्हा परिषद व पंचायत समिती निवडणुकीत ही युती कायम राहील अशी स्थिती आहे. महायुती म्हणून निवडणूक लढवताना जागावाटप हा कळीचा मुद्दा ठरणार आहे. त्यात भांबेड जिल्हा परिषद गट व पंचायत समिती गण या दोन जागांपैकी एका जागेसाठी भाजप पक्ष आग्रही राहणार असल्याची चर्चा केली जात आहे. इच्छुक उमेदवारांची भाऊगर्दी व भाजपपेक्षा भांबेड परिसरात मजबूत संघटन असलेला शिवसेना (शिंदेगट) पक्ष दोन्ही जागांसाठी आग्रही आहे. एकदा महायुतीकडून एखादी जागा भाजपला सोडल्यास कायमस्वरूपी ती जागा भाजपकडे जाईल व शिवसेना पक्ष भांबेड विभागात अडगळीत पडेल, या भीतीपोटी निवडणूक जाहीर होण्याआधीच गुरव यांनी दोन्ही जागांसाठी आक्रमक भूमिका घेतली आहे. भांबेड जिल्हा परिषद गटासाठी सर्वसाधारण महिला व पंचायत समिती गणासाठी सर्वसाधारण पुरुष अशी आरक्षणे निश्चित झाली आहेत. पंचायत समिती गणासाठी सर्वसाधारण पुरुष आरक्षण पडल्याने जिल्हा परिषदेच्या जागेपेक्षा पंचायत समितीच्या जागेसाठी भाजप व शिवसेना आग्रही आहेत.