बचत गटातील महिलांसाठी
रत्नागिरीत आज मेळावा
रत्नागिरी, ता. २० : पुण्यातील ग्रामोन्नती डॉट नेट या संस्थेतर्फे शुक्रवारी (ता. २१) स्वयंवर मंगल कार्यालयात उत्सव उद्योजकतेचा, सन्मान उद्योजिकांचा, लघुउद्योगांचा असा विशेष कार्यक्रम आयोजित करण्यात आला आहे. उमेदअंतर्गत येणाऱ्या महिला उद्योजकांसाठी हा कार्यक्रम आयोजित करण्यात आल्याची माहिती ग्रामोन्नतीचे संचालक अमित अस्नीकर यांनी दिली.
सकाळी ९.३० ते सायंकाळी ४.३० या वेळेत होणार असलेल्या या उत्सवाला दीडशेहून अधिक महिला उपस्थित राहणार असून, निवडक १० यशस्वी उद्योजिकांचा मान्यवरांच्या हस्ते सत्कार करण्यात येणार आहे. यात महाराष्ट्र चेंबर ऑफ कॉमर्स, इंडस्ट्रिज अँड अॅग्रिकल्चरच्या प्रशिक्षण सत्र, सोलर ड्रायरविषयी मार्गदर्शन, माहितीसाठी खेळ अशी सत्रे आयोजित करण्यात आली आहेत. जिल्हा परिषदेच्या मुख्य कार्यकारी अधिकारी वैदही रानडे, महाराष्ट्र चेंबर ऑफ कॉमर्सच्या आरएएमपीचे संचालक अनिरुद्ध ब्रह्मे, महर्षी कर्वे स्त्री शिक्षणसंस्थेच्या बाया कर्वे, व्होकेशनल ट्रेनिंग इन्स्टिट्यूटचे प्रकल्प समन्वयक स्वप्नील सावंत, संचालक माधवी शिंदे, रहेजा सोलार फूड प्रोसेसिंगचे परमित, अनबॉक्सचे गौरांग आगाशे आदी उपस्थित राहणार आहेत.