०६४५९

खासगी बस ५० फूट दरीत
कोसळून २२ प्रवासी जखमी
पोलादपूरजवळ घटना : जखमी दापोली, खेडमधील
खेड, ता. २४ : मुंबई-गोवा महामार्गावर रायगड जिल्ह्यातील पोलादपूर तालुक्यातील भोगावजवळ पुण्याहून खेडच्या दिशेने येणारी खासगी आराम बस ५० फूट दरीत कोसळली. या अपघातात २२ प्रवासी जखमी झाले. अपघात सोमवारी (ता. २४) पहाटे पाचच्या सुमारास झाला.
कशेडी बोगद्यापासून जवळच असलेल्या महामार्गावरील पुलाच्या अलीकडे एक लेन सुरू होती. अर्धा रस्ता वाहतुकीसाठी बंद ठेवला होता. पहाटेच्या सुमारास बॅरिकेड न दिसल्याने बॅरिकेड तोडून बस ४५ ते ५० फूट खोल दरीत कोसळली. या बसमधील २२ प्रवासी गंभीर जखमी झाले आहेत. त्यातील १० प्रवासी अत्यंत गंभीर असल्याने त्यांना चिपळूण येथील खासगी रुग्णालयात दाखल केले आहे. काही जखमींवर कळंबणी उपजिल्हा रुग्णालयात उपचार सुरू आहेत. महामार्गावरील भोगाव गावच्या हद्दीत पुलावरून अर्ध्या रस्त्याची वाहतूक बंद केली होती. काम सुरू असल्याने बॅरिकेड्स लावले होते. एक लेन बंद केल्यामुळे व पहाटेच्या सुमारास धुके असल्याने हा अपघात झाल्याचे सांगण्यात येत आहे.
अपघातातील जखमींची नावे अशी : शामल विजय अंजर्लेकर (वय ४०, रा. गिम्हवणे, दापोली), काजल मारुती शिगवण (२३, दमामे, दापोली), दिलीप शिवराम मोहिते (५५, तळसर, चिपळूण), अमरनाथ मिलिंद कांबळे (२७, लातूर), दीपाली दत्ताराम नाचरे (२७, भडवळे, दापोली), प्रतीक प्रकाश गुरव (२२, शिरवली, खेड), प्रिया प्रकाश गुरव (२३, शिरवली, खेड), आळंदी बालाजी नाचरे (७४, दमामे, दापोली), सर्वेश दीपक गुहागरकर (२६, आडे, दापोली), मयुरी मारुती शिगवण (४५, दमामे, दापोली).
जखमींवर कळंबणी येथील उपजिल्हा रुग्णालयात उपचार सुरू आहेत. अन्य जखमींना चिपळूण येथील खासगी रुग्णालयात तसेच डेरवण रुग्णालयात उपचारार्थ दाखल करण्यात आले आहे.